Камітэт дзяржаўнага кантролю паведаміў, што заснавальнік менскай кампаніі недаплаціў амаль 10 млн рублёў падаткаў. Магчыма, гаворка пра Віталя Сініцкага.
Паводле КДК, уладальнік некалькіх гандлёвых цэнтраў у Менску выкарыстаў незаконную схему драбнення бізнесу з мэтай памяншэння памеру падатковых адлічэнняў. Для гэтага ён арганізаваў размеркаванне выручкі, атрыманай ад здачы памяшканняў у арэнду, паміж 16 афіляванымі структурамі.
У статутны фонд гэтых адмыслова створаных фірмаў унеслі нерухомую маёмасць, якая належыць першапачатковаму ТАА на праве ўласнасці. Пасля камерцыйныя структуры здавалі гэтыя памяшканні ў гандлёвых цэнтрах у арэнду як уласныя, ужываючы спрошчаную сістэму падаткаабкладання.
Пачатая крымінальная справа. Падазраваны затрыманы.
Раней «Наша Ніва» са спасылкай на свае крыніцы паведаміла, што 22 верасня пасля праверкі падатковай інспекцыяй затрыманы кіраўнік кампаніі «Сігмаполюс» Віталь Сініцкі.
Сініцкі займае 38-е месца ў рэйтынгу паспяховых і ўплывовых бізнесоўцаў часопісу «Ежедневник». Ягоная кампанія валодае менскімі бізнес-цэнтрамі «Тытан», «Цівалі», «Арлан», «Хваля», «Анкор», гандлёвым цэнтрам «Трум» і прамысловай базай на вуліцы Гурскага, забудоўвае ўчастак на Нямізе насупраць тэатру Музкамедыі.
Як сцвярджае «Наша ніва», Сініцкі назіраў за крымінальнымі справамі аб «драбленні бізнесу», у тым ліку за затрыманнямі ў «21vek», таму звярнуўся ў падатковую з просьбай правесці праверку ягонага бізнесу наконт таго, ці не пабачаць «драблення» там. Пасля гэтага ён і знік.
МГ belsat.eu