Раніцай 28 верасня на працоўным месцы супрацоўнікі КДБ затрымалі Наталлю Вусько – інжынерку планава-дагаворнага сектару ААТ «Нафтан», паведамляе праваабарончы цэнтр «Вясна».
Таксама ў машыніста помпаў устаноўкі рыформінгу № 5 ААТ «Нафтан» Сяргея Плігаўкі ўдома прайшоў ператрус, яго павезлі на допыт. Вядома, што Сяргей – чалец страйкаму «Нафтану».
Каля 12:00 на працоўным месцы затрымалі Дзмітрыя Кайро – электраманцёра заводу «Палімір». Яго павезлі дадому на ператрус.
Нагадаем, што ўчора супрацоўнікі КДБ прыходзілі з ператрусам да інжынера-канструктара «Нафтану» Аляксандра Балонкіна. Ён намеснік старшыні нізавой арганізацыі Беларускага незалежнага прафсаюзу работнікаў ААТ «Нафтан».
Цяпер Аляксандр Балонкін на волі. Крымінальны артыкул, у межах якіх праводзіліся працэсуальныя дзеянні, невядомы.
Акрамя гэтага праваабаронцам стала вядома, што затрыманыя пасля начной змены 23 верасня ў цэху «Аміяк-3» Андрэй Башан і працаўнік «Хімвалакна» Вадзім Яфіменка цяпер таксама на волі.
Раней паведамлялася, што яны ў СІЗА КДБ у «справе Рабочага руху», якую ўзбудзілі паводле арт. 356 Крымінальнага кодэксу («Здрада дзяржаве»).
АД, belsat.eu
