У афіцыйным тэлеграм-канале Святлана Ціханоўская распавяла, пра што ішла размова пад час сустрэчы з прэзідэнтам ЗША Джо Байдэнам:
«Стоячы ў Белага дому перад журналістамі, я спрабавала зразумець свае пачуцці пасля сустрэчы з прэзідэнтам Байдэнам. Але я тут не адна. За маёй спіной – 36 тысяч беларусаў, якія прайшлі праз арышты і катаванні. 10 з іх – загінулі. Але ўсе яны казалі маім голасам на гэтай сустрэчы».
У размове з Байдэнам Ціханоўская распавяла, што ганарыцца сваім народам, які паўстаў супраць рэжыму і ўжо год супрацьстаіць яму, і заклікала прэзідэнта ЗША падтрымаць шлях беларусаў да дэмакратыі:
«Як палітык, я рада гэтай сустрэчы. Прэзідэнт Байдэн сказаў, што ў свеце працягваецца барацьба паміж аўтакратыяй і дэмакратыяй. І вы ведаеце, што Беларусь у гэтай барацьбе знаходзіцца на перадавой. Таму я заклікала прэзідэнта Байдэна дапамагчы нам зрабіць Беларусь паспяховым прыкладам негвалтоўнага пераходу да дэмакратыі».
Вось асноўныя вынікі сумеснай сустрэчы, якія выказала Святлана Ціханоўская:
- Беларуская рэвалюцыя не звязаная з геапалітыкай. Гэта дэмакратычны выбар беларусаў, і маральны доўг ЗША – падтрымаць нас.
- Суверэнітэт Беларусі не падлягае абмеркаванню і торгу. Любыя здзелкі, падпісаныя нелегітымным рэжымам, незаконныя.
- Рашэннем крызісу могуць стаць толькі новыя свабодныя выбары пад міжнародным кантролем. А ўсе зняволеныя па палітычных матывах павінны быць вызваленыя без якіх-небудзь умоў.
- Крызіс у Беларусі павінен быць уключаны ў міжнародны парадак дня, у ААН і АБСЕ, а ўсе вінаватыя павінны быць прыцягнуты да адказнасці ў міжнародных судах.
Пасля сустрэчы Джо Байдэн напісаў у сваім Twitter што Злучаныя Штаты падтрымліваюць народ Беларусі ў яго імкненні да дэмакратыі і ўсеагульных правоў чалавека.
