Мэркель абяцае працягваць ціск на Лукашэнку, пакуль сітуацыя ў Беларусі не зменіцца
Краіны Еўрапейскага Звязу не аслабяць ціску на ўлады Беларусі да таго часу, пакуль унутрыпалітычная сітуацыя ў краіне не зменіцца. Пра гэта заявіла канцлерка Нямеччыны Ангела Мэркель, перадае ТАСС.
«Мы ў Еўрапейскай радзе прынялі рашэнне аб шырокім санкцыйным пакеце [супраць уладаў Беларусі. – Belsat.eu]. Мы ўвялі персанальныя і эканамічныя санкцыі, у прыватнасці супраць авіякампаніяў, а таксама асноўных галінаў», – нагадала канцлерка падчас франка-нямецкай парламенцкай асамблеі 28 чэрвеня.
Паводле паліытка, Еўразвяз увёў у дзеянне «ўсёабдымны санкцыйны рэжым, ён толькі-толькі пачынае аказваць уздзеянне».
«І мы, зразумела, не аслабім ціску, пакуль сітуацыя ў Беларусі не зменіцца», – заявіла Ангела Мэркель.
24 чэрвеня Еўразвязу ўпершыню ў гісторыі ўвёў супраць рэжыму Аляксандра Лукашэнкі сектаральныя санкцыі. Пад удар трапіў экспарт і транзіт нафтапрадуктаў, калійных угнаенняў, а таксама вытворчасць тытунёвых вырабаў. Беларусі абмежавалі доступ да фінансавага і банкаўскага рынку Еўразвязу. Акрамя таго, еўрапейскаму бізнесу і дзяржаўным структурам забаронена наўпрост ці праз пасярэднікаў гандляваць з Беларуссю тэхналогіямі кантролю інтэрнэту, таварамі падвойнага прызначэння, вайсковымі і паліцэйскімі таварамі.
Але апублікаваныя санкцыі ЕЗ маюць шэраг нюансаў, якія дазваляюць па-рознаму ацэньваць іх магчымыя наступствы.
МГ belsat.eu
