Belsat.eu падводзіць вынікі 28 траўня – 293-га дня паслявыбарчага пратэсту, 10-га дня без TUT.by і пятага дня з захопу самалёта «Ryanair», які зноў прыцягнуў увагу Захаду да Беларусі.
Скандал вакол захопу самалёта «Ryanair» працягвае пашырацца. Гендырэктар «Ryanair» накіраваў ліст у Дэпартамент авіяцыі Беларусі і абвінаваціў улады Беларусі ў наўмысным і незаконным згоне самалёта. Міжнародная арганізацыя грамадзянскай авіяцыі заявіла аб пачатку расследавання інцыдэнту. Генеральны сакратар NATO лічыць, што Расея мела дачыненне да аперацыі супраць самалёта «Ryanair». Украіна пашырыла паветраныя санкцыі: ад 29 траўня будзе не толькі не пускаць самалёты «Белавія» ў свае аэрапорты, але і не дасць ім права транзіту.
І гэта не адзіны дыпламатычны скандал, які цяпер развіваецца: Літва сёння выслала двух беларускіх дыпламатаў, Беларусь адказала тым жа. Акрамя таго, у Беларусі пачалі крымінальную справу супраць мэра Рыгі і міністра замежных справаў Латвіі за замену беларускага дзяржаўнага сцяга на нацыянальны.
Скліканая ўладамі Канстытуцыйная камісія прапануе надаць Усебеларускаму народнаму сходу канстытуцыйны статус найвышэйшага прадстаўнічага органу народаўладдзя Беларусі. Адабраныя ўладамі дэлегаты тады змогуць абвяшчаць імпічмент прэзідэнту.
А ў выпадку дэмакратычных зменаў Захад гатовы даць Беларусі каля $ 10 млрд: апублікавалі Эканамічны план Еўразвязу для дэмакратычнай Беларусі, распрацаваны і прыняты Еўракамісіяй пры ўдзеле каманды Ціханоўскай.
Ды пакуль стасункі з Захадам толькі псуюцца. Сёння Белтэлерадыёкампаніі замарозілі сяброўства ў Еўрапейскім трансляцыйным звязе. Ці наладжваюцца з Усходам, невядома: Аляксандр Лукашэнка прыляцеў у Сочы на перамовы з Уладзімірам Пуціным, сустрэча пачалася каля 18 гадзінаў і на момант публікацыі не завершылася. З адкрытай часткі сустрэчы, якая цягнулася каля 7 хвілінаў, стала вядома, што Пуцін запрасіў Лукашэнку купацца ў моры.
Штодзень у Беларусі гучаць навіны з палітычных судоў.
Сёння суд адхіліў скаргу на затрыманне Соф’і Сапегі. Яна застаецца ў статусе падазраванай. Але ўпершыню за пяць дзён да яе дапусцілі адваката. Навінаў пра справу Рамана Пратасевіча не было.
У Менску адміністратара пратэставага тэлеграм-чату пакаралі 2 гадамі калоніі. Жанчыну завочна асудзілі на «хімію» за ўкусы міліцыянтаў пры затрыманні. Жыхароў Сухарава пакаралі арыштамі за дваровы марш. Адна падсудная кажа, што выходзіла ў краму. За каментары ў інтэрнэце пра загінулых у Баранавічах лётчыкаў сілавікі затрымалі 20 чалавек. Чарговых 13 берасцейцаў судзяць за жнівеньскі пратэст. Для чацвёртай групы па «карагоднай справе» пракурор прасіў ад 1,6 гады «хатняй хіміі» да 2 гадоў калоніі пасялення. А за падпал «Табакеркі» пракурор патрабуе для абвінавачваных ад 2 да 9 гадоў калоніі.
Вечарам 28 траўня мінула 10 содняў з затрымання супрацоўнікаў парталу TUT.by і звязаных з ім бізнесаў. 15 чалавек засталіся ў няволі – то значыць, ім усім мусілі выставіць абвінавачванні.
Ці не адзіная пазітыўная навіна з месцаў пазбаўлення волі: Кацярына Андрэева ўпершыню за паўгода ўбачыла неба. Яна адчувае сябе добра, захоўвае пазітыўны настрой.
АА belsat.eu