Днём 28 траўня Аляксандр Лукашэнка прыляцеў у расейскі Сочы, дзе мае правесці трэція з пачатку года перамовы з Уладзімірам Пуціным. З самалёта Лукашэнка выйшаў у нефармальнай клятчатай куртцы, у якой лётаў у Сочы ў лютым.
Пра візіт вядома няшмат: Аляксандр Лукашэнка заяўляў, што ў павестцы перамоваў эканоміка, рэалізацыя супольных з Расеяй праектаў і «рэагаванне на знешні ціск і санкцыйную палітыку». Расейскі ж бок чакае ад Лукашэнкі тлумачэнняў адносна захопу самалёта «Ryanair» і затрымання грамадзянкі Расеі Соф’і Сапегі.
Звязаны з прэс-службай Лукашэнкі ананімны Telegram-канал «Пул первого» публікаваў фота залі, у якой маюць прайсці перамовы. Інтэр’ер такі самы, як на перамовах у мінулым верасні – з вельмі нізкімі фатэлямі. Няёмкая поза Лукашэнкі выклікала пасля тых перамоваў хвалю жартаў і разважанні аналітыкаў пра «мову цела» Лукашэнкі і Ўладзіміра Пуціна.
АА belsat.eu