Кацярына Андрэева ўпершыню за паўгода ўбачыла неба. Ад яе прыйшоў ліст з гомельскай калоніі

Ігар Ільяш, муж палітычнай зняволенай і журналісткі «Белсату» Кацярыны Андрэевай, атрымаў ад яе 28 траўня першы ліст з Гомельскай папраўчай калоніі № 4.

Кацярына Андрэева на судзе. Менск, Беларусь. 18 лютага 2021 году. Фота: Белсат

Як высветлілася з ліста, Кацярына Андрэева прыбыла ў ПК № 4 яшчэ раніцаю 22 траўня. Піша, што там яна ўпершыню за паўгода ўбачыла неба, сонца, кветкі. Гэта, піша Кацярына, самае галоўнае ўражанне ад першага дня ў калоніі.

«Упершыню за паўгода я проста ішла па асфальце, а над галавою быў гэты велізарны сіні купал з пухнатымі воблачкамі!» – піша Кацярына.

Яна адчувае сябе добра, захоўвае пазітыўны настрой.

Дзе цяпер яшчэ адна зняволеная журналістка «Белсату» Дар’я Чульцова, невядома. 17 траўня яна пісала, што ейнае этапаванне з жодзінскай турмы перанеслі на тыдзень.

Напісаць Кацярыне можна на адрас: ПК № 4, атрад № 8, вул. Антошкіна, д. 3, 246035, г. Гомель.

Кацярына Андрэева і Дар’я Чульцова застаюцца за кратамі ўжо паўгода

Андрэева і Чульцова ўжо паўгода ў няволі. Журналістак «Белсату» затрымалі 15 лістапада 2020 года за стрым з жорсткага разгону падчас акцыі памяці Рамана Бандарэнкі і разбурэння сілавікамі народнага мемарыялу. Кацярыне і Дар’і выставілі абвінавачанне паводле ч. 1 арт. 342 («Арганізацыя і рыхтаванне дзеянняў, што груба парушаюць грамадскі парадак») Крымінальнага кодэксу.

18 лютага 2021 года суддзя Фрунзенскага раённага суда сталіцы Наталля Бугук пакарала Кацярыну і Дар’ю 2 гадамі пазбаўлення волі ў калоніі агульнага рэжыму. Яны не прызналі віны і назвалі пераслед помстаю за прафесійную дзейнасць.

Дар’я Чульцова і Кацярына Андрэева: што трэба ведаць пра зняволенных журналістак «Белсату» і іх пераслед

ІІ belsat.eu

Hавiны