Гендырэктар «Ryanair» абвінаваціў улады Беларусі ў наўмысным і незаконным згоне самалёта

Гендырэктар «Ryanair» Майкл ОʼЛіры накіраваў ліст у Дэпартамент авіяцыі Беларусі наконт інцыдэнту з рэйсам Афіны – Вільня. Пра гэта піша «Wall Street Journal».

ОʼЛіры назваў дзеянні ўладаў Беларусі наўмысным і незаконным згонам. Ён падкрэсліў, што ўлады рабілі хлуслівыя заявы ў сваёй справаздачы.

Гендырэктар авіякампаніі распавёў у лісце, што працаўнікі менскага аэрапорту перашкаджалі аператыўна вярнуць самалёт у неба: у прыватнасці, яны не хацелі запраўляць самалёта, адмовіліся прымаць аплату паліва крэдытаваю карткаю, не далі перакладчыка на англійскую мову. Таксама ўлады не спрабавалі звязацца з цэнтральным офісам «Ryanair».

Кіраўнік «Ryanair» заклікаў вызваліць Рамана Пратасевіча і высветліць асобы пасажыраў, якія сышлі з самалёта ў Менску, бо яны могуць быць агентамі спецслужбаў, датычнымі да згону самалёта.

Нагадаем, што самалёт «Ryanair» 23 траўня зрабіў вымушаную пасадку ў Менску праз інфармацыю пра мініраванне, якую экіпаж атрымаў ад беларускіх дыспетчараў. Блогер Раман Пратасевіч, які ляцеў гэтым рэйсам, і ягоная дзяўчына Соф’я Сапега былі затрыманыя спецслужбамі. Вымушаная пасадка самалёта была справакаваная беларускімі спецслужбамі менавіта дзеля затрымання апазіцыйнага блогера.

Інцыдэнт з рэйсам «Ryanair» выклікаў міжнародны скандал: палітыкі, дыпламаты і міжнародныя арганізацыі рэзка асудзілі дзеянні рэжыму Лукашэнкі. Саміт ЕЗ заклікаў забараніць беларускім авіякампаніям палёты ў Еўразвяз, а таксама заклікаў авіяперавознікаў ЕЗ адмовіцца ад палётаў над тэрыторыяй Беларусі. Пакуль рашэнне саміту Еўразвязу не ўхваленае канчаткова, але шэраг краінаў самі забаранілі палёты «Белавіі».

ІІ belsat.eu