Каталікі святкуюць Вербную нядзелю

Вербніца. Чырвоны касцёл у Менску. 28 сакавіка 2021. Фота: ТК / Белсат

Сёння, 28 сакавіка, у каталікоў Вербніца. Гэта вялікае свята падчас Вялікага посту – з гэтага дня пачынаецца Вялікі тыдзень перад Вялікаднем.

У Вербную, або Пальмавую нядзелю ўспамінаюць сюжэт пра ўезд Ісуса ў Іерусалім. Паводле каталіцкай традыцыі, у гэты дзень ладзяцца тэатралізаваныя паказы на біблейскую тэму.

Згодна з евангельскім пісаннем, уваход Гасподні ў Іерусалім – адна з галоўных падзеяў апошніх дзён зямнога жыцця Хрыста: на наступным тыдні яму здрадзяць, ўкрыжуюць, а потым здзейсніцца цуд – уваскрашэнне Збаўцы з мёртвых.

Фота: ТК / Белсат
Фота: ТК / Белсат
Фота: ТК / Белсат
Фота: ТК / Белсат

У Вербную нядзелю адбываюцца службы ў касцёлах, вернікі прыходзяць асвячаць вярбовыя галінкі. Сёлета, як і год таму, дзеяць супрацьэпідэмічныя нормы: прыхаджане павінны быць у масках, прытрымлівацца сацыяльнай дыстанцыі, перад уваходам у святыню апрацоўваць рукі антысептыкам. У касцёлах на ўваходзе паставілі адмысловыя дазатары.

Самы строгі пост у каталікоў – на гэтым тыдні. У пятніцу можна есці хлеб і піць ваду, але гэта пастанаўляе вернік.

Фота: ТК / Белсат
Фота: ТК / Белсат
Фота: ТК / Белсат
Фота: ТК / Белсат

Шмат якія касцёлы будуць трансляваць службу на вуліцу, каб мінімізаваць рызыку заражэння. Галінкі вярбы будуць асвячацца і ў касцёле, і на звонку. Таксама будзе онлайн-трансляцыя, каб людзі маглі ўзяць удзел з дому.

Пасля наведання набажэнства і асвячэння галінак вернікі нясуць іх дамоў і захоўваюць да наступнага Вялікага посту. У каталікоў існуе традыцыя спальваць асвячоныя летась галінкі перад Вялікім постам. Попел прызначаецца на службу ў Папяльцовую сераду.

Фота: ТК / Белсат
Вербніца. Чырвоны касцёл у Менску. 28 сакавіка 2021. Фота: ТК / Белсат

МГМ, belsat.eu

Hавiны