Пяты дзень вайны ва Украіне. ОНЛАЙН

Украінская армія адбівае атакі расейскай. За апошнія чатыры дні расейцы не здолелі ўзяць аніводнага буйнога гораду. Краіны Захаду падтрымалі Кіеў і звялі санкцыі супраць Расеі. «Белсат» сочыць за падзеямі.

 

Храналагічна
00:07

На сёння мы завяршаем працу онлайну. Дзякуем, што былі з намі!

00:01

Беларускія падраздзяленні рухаюцца да мяжы Украіны на Валынскім кірунку, паведамляе Генштаб УСУ.

Таксама, паведамляецца, што самалёты ВС РФ аднавілі паветраную разведку аб’ектаў ва Украіне з паветранай прасторы Беларусі.

23:58

Прэзідэнт Украіны Уладзімір Зяленскі падвёў вынікі пятага дня вайны.

У сваім звароце ён згадаў сённяшні абстрэл Харкава, Кіева і іншых гарадоў Украіны, а таксама выказаўся наконт украінска-расейскіх перамоваў.

Сёння 12 украінскім вайскоўцам былі прысвоены званні Герой Украіны, шасці з іх – пасмяротна.

23:40

Мэр Харкава Ігар Церахаў заявіў, што расейскія войскі працягваюць абстрэльваць горад, пачалі ўзрываць падстанцыі.

23:38

У Нью-Ёрку статую Свабоды на знак салідарнасці ўпрыгожылі ўкраінскім сцягам.

23:32

Зяленскі падпісаў бязвізавы рэжым для замежных добраахвотнікаў, за выключэннем грамадзян Расеі

23:30

Марыупаль часткова застаўся без электрычнасці, газу і інтэрнэту.

23:06

Meta (кампаніі Facebook, Instagram, WhatsApp і Oculus.) абмяжуе доступ да прапагандысцкіх расейскіх акаўнтаў RT і Sputnik на тэрыторыі ЕЗ.

23:04

Расейскіх салдат кормяць пратэрмінаванымі пайкамі, тэрмін прыдатнасці якіх скончыўся яшчэ ў 2015-м годзе.

22:55

Першая краіна адмовілася ад закупак расейскай нафты – гэта Канада. Аб такім рашэнні аб’явіў прэмʼер краіны Джасцін Трюдо.

22:45

Спадарожнікавая сувязь «Starlink» ад кампаніі Ілона Маска ўжо прыбыла ва Украіну, паведамляе міністр лічбавай трансфармацыі Міхайла Фёдараў.

22:37

З пачатку ўварвання Расея выпусціла 113 аператыўна-тактычных ракет «Іскандэр» і «Калібр» па мірных гарадах і сёлах Украіны

«Гэтае крывавае злачынства пуцінскага рэжыму з’яўляецца парушэннем нормаў Міжнароднага гуманітарнага права і патрабуе расследавання Гаагскага трыбунала», – паведаміў галоўнакамандуючы Узброенымі сіламі Украіны Валерый Залужны.

22:20

Кіраўнік Еўракамісіі Урзуля фон дер Ляйен сказала, што ўкраінцы з’яўляюцца часткай еўрапейскай сямʼі і будуць прыняты ў ЕЗ.

Украіна «адна з нас і мы хочам, каб яна была ў Еўрапейскім Звязе», – сказала Урзуля фон дер Ляйен Euronews. Але яна не сказала, што гэта будзе хуткае ўступленне.

Еўрапарламент заўтра мае прыняць заклік да Еўракамісіі, каб даць Украіне статус краіны-кандыдата.

Прэзідэнт Украіны Уладзімір Зяленскі і Урзуля фон дер Ляйен. Фота: Stephanie Lecocq/Pool/AFP via Getty Images

Кіраўніца Еўракамісіі таксама сказала, што давер да Уладзіміра Пуціна «цалкам парушаны і разбураны».

22:04

Украінскі амбасадар на генеральнай асамблеі ААН:

«Калі ён (Пуцін) хоча здзейсніць самагубства, то не трэба выкарыстоўваць ядзерны арсенал. Яму варта зрабіць тое, што зрабіў той хлопец у бункеры ў Берлне ў траўні 1945 года».

22:00

Украінскія пілоты адправіліся ў Польшчу за знішчальнікамі МіГ-29.

21:56

Брытанія забараніла расейскім караблям заходзіць у свае парты.

21:41

ЗША аб’явілі 12 расейскіх дыпламатаў пры ААН персонамі нон грата, паведаміў пасол Расеі пры ААН Васілій Нябензя.

Яны мусяць пакінуць краіну да 7 сакавіка.

21:39

Прэзідэнты Балгарыі, Чэхіі, Эстоніі, Латвіі, Літвы, Польшчы, Славаччыны і Славеніі лічаць, што Украіна заслугоўвае перспектывы неадкладнага ўступлення ў Еўрапейскі Звяз.

21:37

Масіраваная DDoS-атака здзейсненая на афіцыйны сайт кіраўніка ДНР.

21:24

Еўразвяз увёў новы пакет санкцыяў супраць Расеі

У спісе апынуліся прэс-сакратар прэзідэнта Расеі Дзмітрый Пяскоў, кіраўнік НК «Роснефть» Ігар Сечын, кіраўнік ПАТ «Транснефть» Мікалай Токараў, заснавальнік і асноўны акцыянер «USM» Алішэр Усманаў.

Акрамя гэтага санкцыі ўвялі супраць уладальнікаў кансорцыуму «Альфа-Групп» Міхаіла Фрыдмана і Пятра Авена, сяброў Пуціна Генадзя Цімчанкі і Сяргея Ралдугіна.

Таксама пад санкцыі трапілі прапагандысты Аркадзь Мамантаў, Антон Красоўскі, Раман Бабаян, Вольга Скабеева і Тыгран Кеасаян.

21:17

Сірэны паветранай трывогі зноў гучаць у Кіеве, Дняпры, Львове, Вінніцы.

21:12

Расея ўжо страціла 3 трлн долараў у выніку поўнамаштабнай агрэсіі супраць Украіны, заявіў эканаміст Яраслаў Раманчук.

20:53

Вадзім Пракоп’еў звярнуўся да беларускіх вайскоўцаў.

20:51

Прэзідэнт Францыі Эманюэль Макрон падчас тэлефонных перамоваў папрасіў прэзідэнта РФ Уладзіміра Пуціна спыніць вайну і ўдары па мірных жыхарах Украіны.

Прэзідэнт Расеі назваў тры ўмовы:

  • прызнанне расейскага суверэнітэту над Крымам;
  • дэмілітарызацыю і дэнацыфікацыю Украіны;
  • забеспячэнне нейтральнага статусу ўкраінскай дзяржавы.
20:43

У Бравары (левы бераг Кіева) заходзіць расейская тэхніка, паведамляе дэпутат мясцовай рады Аляксей Дарашэнка.

Сёння расейскія войскі здзейснілі авіяналёт на Бравары, у выніку якога шэсць чалавек былі параненыя.

20:40

Украінцы закідалі расейскую тэхніку кактэйлямі Молатава наўпрост са свайго аўта.

20:36

Старшыня Еўрапейскага парламенту Жузэп Бурэль паведаміў, што краіны Еўразвязу ўхвалілі найхутчэйшую сінхранізацыю ўкраінскай і еўрапейскай энергасістэмаў.

20:27

Відэа кіеўскіх Бравароў пасля авіяналётаў

20:11

Былы прэзідэнт Украіны Пятро Парашэнка запісаў зварот з бамбасховішча.

19:59

Мэр Чарнігава Уладзіслаў Атрашэнка звярнуўся да гомельцаў, беларусаў і старшыні гомельскага гарвыканкаму Пятра Кірычэнкі:

«Нягледзячы на добрае стаўленне да вас, мы будзем абараняць сваю зямлю. Вы не ўяўляеце настрою людзей, якія ўзялі ў рукі зброю. І калі вашыя дзеці прыйдуць на тэрыторыю Украіны, яны будуць гарэць жыўцом у танках і БТР».

19:55

ФІФА і УЕФА адхілілі зборную Расеі ад удзелу ўва ўсіх турнірах.

Таксама УЕФА разрывае кантракт з расейскім «Газпромам».

19:53

Мэр Кіева Віталь Клічко праінфармаваў аб сітуацыі ў Кіеве.

19:45

Офіс прэзідэнта Украіны па выніках перамоваў з Расеяй зрабіў заяву

«Украінская і расейская дэлегацыі, якія сустрэліся ў раёне ўкраінска-беларускай мяжы, правялі першы раўнд перамоваў з мэтай знаходжання кропак судотыку для найхутчэйшага спынення агню і баявых дзеянняў.

Бакі падрабязна абмеркавалі шэраг ключавых тэмаў, у якіх яны маюць перспектывы знаходжання ўзаемапрымальных рашэнняў.

Прынятае рашэнне неадкладна выйсці на дадатковыя кансультацыі ў сталіцах дзяржаваў. Пасля чаго бліжэйшым часам павінен прайсці другі раўнд перамоваў украінскага і расейскага бакоў».

19:41

Украіна звярнулася да ЕЗ з просьбай перадаць ваенную тэхніку, у тым ліку сістэмы супрацьпаветранай і проціракетнай абароны, а таксама гарматы, мінамёты і аўтаматы, паведамляе «Bloomberg».

19:35

Прэм’ер-міністр Украіны Дзяніс Шмыгаль выступіў з брыфінгам аб сітуацыі ў краіне.

19:22

Паведамляецца, што расейская авіяцыя нанесла ўдар па ваенным цэнтры радыёлакацыйнай сувязі ў Браварах у Кіеўскай вобласці.

 

19:16

Дарадца кіраўніка Офісу прэзідэнта Міхайла Падаляк пракаментаваў перамовы ў сваім Twitter.

19:12

У Харкаве таксама прагучалі тры моцныя выбухі. Ідзе абстрэл.

19:06

У Кіеве адбыўся моцны выбух

У горадзе абвесцілі паветраную трывогу ў выніку пагрозы ракетных удараў.

19:00

Расейскія войскі могуць пачаць глушыць мабільную сувязь і інтэрнэт ва Украіне для распаўсюджвання дэзінфармацыі, папярэджвае штаб Аперацыі Аб’яднаных сілаў.

18:54

Зварот дарадцы кіраўніка Офісу ўкраінскага прэзідэнта Міхайлы Падаляка пасля ўкраінска-расейскіх перамоваў.

Ён паведаміў, што сёння быў толькі першы раўнд перамоваў аб перадухіленні ваенных дзеянняў.

18:32

Вадзім Пракоп’еў паведаміў, што ён цяпер ва Украіне і гатовы ваяваць за гэтую краіну і Беларусь

Ён таксама заклікаў беларускіх вайскоўцаў далучацца.

18:28

Наступная сустрэча ўкраінскай і расейскай дэлегацыяў адбудзецца на беларуска-польскай мяжы ў найбліжэйшыя дні, паведаміў кіраўнік расейскай дэлегацыі на перамовах з украінскім бокам, памочнік прэзідэнта РФ Уладзімір Мядзінскі.

Ён паведаміў, што «на перамовах знойдзеныя пункты, у якіх можна прагназаваць агульныя пазіцыі».

18:22

Перамовы Расеі і Украіны завершаныя

«Расейская і ўкраінская дэлегацыя сёння вызначылі шэраг прыярытэтных тэмаў, у якіх намецілі пэўныя рашэнні», – сказаў дарадца кіраўніка Офісу ўкраінскага прэзідэнта Міхайла Падаляк.

Цяпер украінская і расейская дэлегацыі едуць у свае сталіцы для кансультацыяў.

18:19

Паведамляецца пра калону аўтобусаў медычнай дапамогі ў Мазыры. Імаверна, у іх перавозяць параненых і загінулых вайскоўцаў з Украіны.

18:05

Кадры сённяшняга абстрэлу Харкава. Страляюць у бок жылых дамоў.

17:57

Прэзідэнт Украіны Уладзімір Зяленскі падпісаў заяўку на сяброўства краіны ў Еўрапейскім Звязе

17:41

Пуцін падпісаў указ аб спецыяльных эканамічных мерах у сувязі з увядзеннем санкцый Захаду.

17:39

Беларусы сталі на абарону Украіны разам з украінцамі.

17:34

Відэа, як работнікі хуткай дапамогі ў Марыупалі ратуюць пацярпелых мірных жыхароў пасля абстрэлу гораду.

17:28

Жыхары сяла Дабранка на мяжы з Беларуссю сабраліся на мітынг і праз узмацняльнік звярнуліся да беларусаў:

«Ні Расею, ні беларускія войскі мы не прапусцім. Едзьце дадому».

17:12

Пачынаецца экстранае паседжанне Генасамблеі ААН

Учора Рада Бяспекі ААН склікала экстраную адмысловую сесію Генеральнай асамблеі аб уварванні Расеі ва Украіну. Галасаванне ў Радзе Бяспекі, у склад якой уваходзіць 15 краін, насіла працэдурны характар, і Расея не магла выкарыстоўваць права вета.

17:09

З пачатку перамоваў Расеі і Украіны прайшло 4 гадзіны

БелТА паведамляе, што асноўныя патрабаванні ўкраінскага боку – вывад расейскіх войскаў з Украіны і спыненне агню. Так заявіў сёння журналістам саветнік кіраўніка Офіса прэзідэнта Украіны Аляксей Арэстовіч.

Расейская дэлегацыя мае намер абмеркаваць пытанні міру на перамовах з украінскімі ўладамі, сказаў напярэдадні намеснік міністра замежных справаў Андрэй Рудэнка.

17:04

Расейскія вайскоўцы пад крыкі мясцовых жыхароў «Бердянськ – це Україна!» пакінулі плошчу перад Бярдзянскім гарсаветам.

17:00

Украіна рыхтуе заяўку на ўступленне ў Еўразвяз

«Народ Украіны ўжо даўно зрабіў свой выбар», – напісаў прем’ер-міністр Украіны Дзяніс Шмыгаль.

16:51

Петыцыю з патрабаваннем спыніць вайну ва Украіне падпісалі больш за мільён чалавек.

 

16:41

Так выглядаюць харкаўская кватэра і машыны ў двары пасля сённяшняга абстрэлу гораду.

15:51

Ва Украіне створаць інтэрнацыянальны легіён.

Некалькі тысяч еўрапейцаў ужо жадаюць ваяваць на баку Украіны ў замежным легіёне, паведаміла намесніца міністра абароны Украіны Ганна Маляр.

15:34

Міжнародная федэрацыя хакею (IIHF) пазбавіць расейскую і беларускую хакейныя федэрацыі сяброўства.

Зборныя Расеі і Беларусі будуць выключаны з ліку ўдзельнікаў чэмпіянацу свету – 2022 у Фінляндыі, іх месцы зоймуць каманды Аўстрыі і Францыі.

15:25

Паведамляецца, што ЗША пачынаюць прамыя пастаўкі пераноснага зенітнага ракетнага комплексу «Stinger» ва Украіну. Транспартаваць будуць, як мяркуецца, праз тэрыторыю Польшчы.

 

Таксама сёння раніцай Нямеччына змагла перадаць Украіне першыя браняваныя аўтамабілі ў межах пакета абарончай дапамогі краіне, паведаміла прадстаўнік МЗС ФРГ Андрэа Засэ (Andrea Sasse).

15:20

Міністэрства аховы здароўя Украіны паведамляе, што з пачатку ваеннага ўварвання Расейскай Федэрацыі ва Украіну былі параненыя 2040 мірных жыхароў. З іх 45 дзяцей.

Загінулі – 352 чалавекі. З іх 16 дзяцей.

15:16

З-за пашкоджанняў у выніку баявых дзеянняў поўнасцю або часткова абясточаны 316 населеных пунктаў і 332 тысячы грамадзян Украіны.

15:11

Амбасада ЗША спыняе працу ў Беларусі. Усе супрацоўнікі эвакуяваныя.

15:09

Найбуйнейшы сэрвіс па здыме жылля Airbnb прадаставіць 100 тысячам украінцаў бясплатнае часовае жыллё.

Таксама паведамляецца, што любы, хто зацікаўлены ў адкрыцці сваіх дамоў для падтрымкі гэтых намаганняў, можа даведацца, як узяць удзел на Airbnb.org.

15:04

Кадры з вуліц Харкава пасля абстрэлу з расейскіх Градаў.

15:01

Дзве гадзіны працягваюцца перамовы ўкраінскай і расейскай дэлегацый

14:44

ААН паведамляе, што з 24 лютага забілі 102 мірных жыхароў Украіны

Сярод загінулых – 7 дзяцей. Яшчэ 304 чалавекі былі параненыя, паведаміла камісарка ў справе правоў чалавека Мічэль Бачэле (Verónica Michelle Bachelet Jeria).

«Большасць гэтых цывільных асоб былі забітыя выбуховай зброяй з шырокай вобласцю ўдару, у тым ліку абстрэламі цяжкімі артылерыйскімі і шматпускавымі ракетнымі комплексамі. Я баюся, што рэальныя лічбы значна вышэйшыя».

Паводле звестак ААН, колькасць уцекачоў, якія пакінулі Украіну, дасягнула 422 тысяч.

«Уцекачы разумеюць, што беларусы не хочуць вайны»: валанцёрка – пра дапамогу на ўкраінска-польскай мяжы

14:41

Сэрвіс таксі «Bolt» спыняе сваю працу ў Беларусі.

14:26

Жылыя кварталы Харкава абстрэльваюць. Паведамляецца аб 14 параненых і 3 загінулых.

14:18

Расейскі бізнесовец Алег Цінькоў выказаўся супраць вайны ва Украіне:

«Цяпер ва Украіне гінуць нявінныя людзі, кожны дзень, гэта неймаверна і недапушчальна! Дзяржавы мусяць выдаткоўваць грошы на лячэнне людзей, на даследаванні перамогі над ракам, а не на вайну. Мы супраць гэтай вайны!»

 

Посмотреть эту публикацию в Instagram

 

Публикация от Oleg Tinkov (@olegtinkov)

14:10

На Ахтырку расейскай ваенныя скінулі забароненыя Жэнеўскай канвенцыяй вакуумныя бомбы.

«Вораг вядзе подлую вайну. На Ахтырку зноў была скінута вакуумная бомба, на склад нафтавага наліву, узарваныя ёмістасці з нафтай», – паведаміў галава гораду Ахтыркі (Сумская вобласць) Павел Кузьменка ў сябе на старонцы ў Facebook.

13:59

Вайскоўцы з вострава Змяіны, якія далі «адказ» расейскаму вайсковаму караблю, жывыя і застаюцца ў палоне – паведамляе ВМС УСУ.

Раней паведамлялася, што ўсе 13 абаронцаў вострава загінулі.

13:56

Расейскі міністр абароны Сяргей Шайгу заявіў, што ў адказ на просьбу Пуціна сілы ядравага стрымлівання Расеі прыведзеныя ў падвышаную боегатовасць.

13:46

Узламаныя сайты беларускіх ведамстваў: Міністэрства сувязі ды інфарматызацыі, Міністэрства абароны, Дзяржаўнага вайскова-прамысловага камітэту.

Пра гэта паведаміла хакерская група Anonymous.

13:34

Харкаў абстралялі з «Градаў». «Дзясяткі загінулых і сотні параненых. Гэты жах павінен убачыць увесь свет», – сказаў былы народны дэпутат Украіны Антон Герашчанка.

13:28

Японія вылучыць Украіне 100 мільёнаў долараў для стрымлівання расейскай агрэсіі. Таксама ўрад Японіі цалкам падтрымлівае ўсе ўведзеныя супраць РФ санкцыі.

 

13:19

У Кіеве, Харкаве і Вінніцы аб’яўленая паветраная трывога.

13:14

Хакеры ўзламалі расейскі сайт ТАСС і размясцілі заклік спыніць вайну ва Украіне. На беларускім сайце «Onliner» з’явілася такое ж паведамленне.

Таксама збоі назіраюцца ў «Коммерсанта», «Известий», «РБК», інфармацыйнага парталу «Право.ру», «Buro 24/7», «Forbes» і многіх іншых расейскіх выданняў.

13:11

У горадзе Ахтырка ў Сумскай вобласці падарвалі нафтабазу.

13:02

У Чарнігаве гарыць гіпермаркет «Эпіцэнтр» і жылыя дамы побач.

12:53

Пачаліся перамовы расейскай і ўкраінскай дэлегацый.

Яны праходзяць у Гомельскай вобласці на мяжы Украіны і Беларусі.

12:46

БелТА адключыла жывы эфір з украінска-расейскіх перамоваў. Яны мусяць пачацца з хвіліны на хвіліну.

12:42

Адміністрацыйныя будынкі ў Бярдзянску занятыя расейскімі вайскоўцамі. Мясцовыя жыхары выказваюць сваю незадаволенасць.

12:32

Пачаліся перамовы расейскай і ўкраінскай дэлегацый

Як доўга яны будуць працягвацца, невядома. Дакладныя часавыя рамкі не вызначаныя.

12:28

MEGOGO, адзін з найбуйнейшых міжнародных медыясэрвісаў ва Усходняй Еўропе для прагляду відэа, ТБ і праслухоўвання аўдыя, выдаліў са свайго сэрвісу ўсе расейскія фільмы.

 

12:15

Украіна падае заяўку на ўступленне ў Еўрапейскі Звяз паводле спецыяльнай працэдуры, паведаміў прэм’ер-міністр Украіны Дзяніс Шмыгаль раніцай 28 лютага:

«Прыняць Украіну ў Еўразвяз паводле новай асаблівай працэдуры ўчора пасля нашай гутаркі прапанаваў прэмʼер Славакіі Эдуард Гэгер. Уначы прэзідэнт Украіны Уладзімір Зяленскі меў адпаведную размову з прэзідэнтам Еўракамісіі Урзуляй фон дэр Ляен.

Украінцы ўжо даўно зрабілі свой цывілізацыйны выбар. Мы разлічваем, што рашэнне будзе прынятае неадкладна. Як адзначыў прэзідэнт, гэта і магчыма і справядліва».

12:09

У Расеі масава блакуюць незалежныя медыі.

Ужо заблакаваныя сайты «Настоящего времени», «The New Times», «Крым. Реалии», «Интерфакс-Украина», «Гордон» і union.net.

12:05

Сойм Латвіі аднагалосна прыняў закон, які прадугледжвае дазвол грамадзянам Латвіі добраахвотна ваяваць за Украіну.

Змяненні ў закон падтрымалі 87 дэпутатаў.

«Нашы грамадзяне, якія хочуць падтрымліваць Украіну і добраахвотна весці вайсковую службу там, каб абараняць незалежнасць Украіны і нашу агульную бяспеку, мусяць мець магчымасць гэта зрабіць», – сказаў Юрыс Ранцанс (Juris Rancāns), кіраўнік камісіі ў справе абароны, адказнай за прасоўванне законапраекту.

12:00

Літва звярнулася ў Міжнародны крымінальны суд з просьбай пачаць расследаванне «ваенных злачынстваў і злачынстваў супраць чалавечнасці, учыненых Расеяй і Беларуссю ва Украіне».

Са словаў міністаркі юстыцыі Літвы Эвэліны Дабравольскай, у сітуацыі жорсткай агрэсіі Расеі і Беларусі супраць Украіны трэба неадкладна дзейнічаць.

11:55

Кіроўцы, якія займаюць палосы грамадскага транспарту ў Кіеве, будуць лічыцца дыверсантамі. Пра гэта заявілі ў Кіеўскай гарадской радзе.

Цяпер ездзіць па палосах грамадскага транспарту могуць аўтамабілі са спецгрузамі, грамадскі транспарт, вайсковая тэхніка і карэты хуткай дапамогі. Сталічныя ўлады Кіева нагадваюць, што горад жыве ва ўмовах ваеннага становішча, і просяць кіроўцаў «не падвяргаць сябе небяспецы».

11:44

УСУ супольна з Нацгвардыяй і «Азовам» знішчылі варожы самалёт расейскіх вайскоўцаў, паведаміў мэр Марыупалю Вадзім Бойчанка.

«Ён учора чатыры разы абстрэльваў пасёлак Сартану і левабярэжны раён Марыупалю. Слава нашым абаронцам! Слава нашым героям! Слава Украіне!» – сказаў мэр гораду.

11:35

«Беларусаў пакуль у палон бяруць без праблем»

Украінскі салдат запісаў зварот да беларускіх вайскоўцаў, якія едуць ваяваць на ўкраінскую тэрыторыю.

11:27

Уладзімір Зяленскі абвясціў аб вызваленні з турмаў усіх удзельнікаў баявых дзеянняў для абароны Украіны ў зонах канфлікту.

«Было прынята рашэнне не простае з маральнага пункту гледжання, але карыснае з пункту гледжання нашай абароны. Ключавое цяпер – абарона», – сказаў Зяленскі.

Таксама з некаторых удзельнікаў АТА здымаюцца ўсе санкцыі. Зяленскі падкрэсліў, што кожны, хто можа далучыцца да барацьбы з акупантамі, мусіць гэта рабіць.

11:22

У Харкаве ўводзіцца каменданцкая гадзіна з 15:00 28 лютага да 6:00 1 сакавіка. Аб гэтым паведаміў кіраўнік Харкаўскай абласной дзяржаўнай адміністрацыі Алег Сынегубаў.

11:08

Аператыўная сітуацыя на дыпламатычным фронце паводле Вярхоўнай Рады Украіны

Украінская дыпламатыя мабілізавала антыпуцінскую кааліцыю для падтрымання Украіны: 84 краіны і 13 міжнародных арганізацыяў.

  • За першыя 100 гадзінаў абароны сабралі больш за 1 мільярд долараў на дапамогу Украіне ў набыцці сучаснай зброі і боепрыпасаў для ўкраінскіх сілаў абароны.
  • ЗША, Канада, Вялікая Брытанія, Аўстралія, ЕЗ і іншыя краіны прапаноўваюць вялікую колькасць пераносных зенітна-ракетных комплексаў, супрацьтанкавых комплексаў, стралковай зброі, боепрыпасаў, сродкаў размінавання, шлемаў, медычных аптэчак, паліва для вайсковай тэхнікі.
  • Удакладняецца спіс расейскіх банкаў для адключэння ад SWIFT.
  • Замарожаная палова фінансавых рэзерваў Цэнтрабанку Расеі.
  • Расейскі рубель ужо абваліўся да гістарычнага мінімуму.
  • 32 краіны закрылі паветраную прастору для расейскіх авіякампаніяў і самалётаў.
  • У Еўропе масава закрываюць расейскія каналы RT і Sputnik.
11:03

Прэзідэнт Украіны Уладзімір Зяленскі звярнуўся да ўкраінцаў.

«Калі я ішоў у прэзідэнты, я казаў, што кожны з вас прэзідэнт. Бо ўсе мы адказныя за сваю дзяржаву. За нашую прыгожую Украіну. І вось так атрымалася, што кожны з нас – воін. Воін на сваім месцы. І я ўпэўнены, што кожны з нас пераможа».

Зяленскі заклікаў неадкладна прыняць Украіну ў ЕЗ паводле новай спрошчанай працэдуры.

10:58

У Кіеве – чэргі ў супермаркеты і ў аптэкі. Людзі спрабуюць купіць хоць ваду за наяўныя. Тэрміналы не працуюць. Раней кіраўніцтва сталіцы паведамляла, што крамы будуць адчыняцца паступова.

10:57

У Кіеве ізноў абвешчаная паветраная трывога!

10:49

Верталёты з чальцамі ўкраінскай дэлегацыі прыбылі да месца перамоваў з Расеяй.

Як перадае «Українська правда», у склад украінскай дэлегацыі ўвайшлі:

• міністр абароны Аляксей Рэзнікаў,
• намеснік кіраўніка МЗС Мікола Тачыцкі,
• дарадца кіраўніка офісу прэзідэнта Міхаіл Падаляк,
• кіраўнік фракцыі «Слуга народу» Давід Арахамія,
• дэпутат Рустам Умераў,
• першы намеснік кіраўніка ўкраінскай дэлегацыі ў трохбаковай кантактнай групе Андрэй Косцін.

10:45

Каля 800 чалавек арыштаваныя падчас антываенных пратэстаў учора

Згодна з афіцыйнымі звесткамі, Беларусь прагаласавала за адмову ад свайго бяз’ядравага статусу на рэферэндуме. Гэта значна павялічыла напружанасць у краіне, якая сталася пляцоўкай для расейскага ўварвання ва Украіну.

«Нягледзячы на шматлікія заклікі дэструктыўных Telegram-каналаў да дэстабілізацыі сітуацыі, якія распаўсюджвалі грамадзяне за межамі краіны, масавых пратэстаў не адбылося. Супрацоўнікі міліцыі былі нацэлены на аператыўнае рэагаванне і спыненне правакацый», – адзначылі ў МУС.

10:36

Курс беларускага рубля на валютна-фондавай біржы абваліўся на 10 %.

Курс долара ў Беларусі перакрочыў 3 рублі

10:22

Харкаўская вобласць, вёска Благадатнае

10:15

Планаваны пачатак перамоваў паміж Расеяй і Украінай – а 12:00!

10:02

Расейскія вайскоўцы заявілі, што атрымалі кантроль над украінскай паветранай прасторай.

«Расейская авіяцыя атрымала панаванне ў паветры над усёй тэрыторыяй Украіны», – гаворыцца ў заяве прэс-сакратара Мінабароны РФ генерал-маёра Ігара Канашэнкава.

«Белсат» не можа праверыць гэтай заявы, расейскія вайскоўцы неаднаразова падавалі некарэктную інфармацыю.

09:55

Швецыя адправіць ва Украіну супрацьтанкавую зброю. Гэта першае такое рашэнне пасля нападу СССР на Фінляндыю ў 1939 годзе. Агульная сума фінансавага і вайсковага падтрымання, пра якую заявілі ў Стакгольме ў нядзелю, складзе 1,4 мільярда шведскіх крон, то бок амаль 150 мільёнаў долараў.

09:39

Хакеры «Anonymous» атакавалі беларускія банкі.

«Anonymous» знішчае банкаўскія сайты ў Беларусі», – паведамляюць хакеры ў Twitter.

Мішэнямі хакераў сталіся «Прыёрбанк», «Беларусбанк» і «Белінвестбанк». Старонкі гэтых банкаў не адкрываюцца.

09:09

На Луганшчыне горад Шчасце знішчаны расейцамі на 80 %, паведамляе УНІАН.

Старшыня Луганскай АДА Сяргей Гайдай распавядае, што такіх разбурэнняў не было нават у 2014–2015 гадах: людзей немагчыма эвакуяваць, бо аўтобусы абстрэльваюцца «Градамі».

08:59

Узброеныя сілы Украіны паведамляюць пра страты акупантаў на ўкраінскай зямлі з 24 лютага:

  • самалёты – 29;
  • гелікаптэры – 29;
  • танкі – 191;
  • баявыя браняваныя машыны – 816;
  • гарматы – 74;
  • ЗРК «Бук» – 1;
  • «Град» – 21;
  • аўтамабільная тэхніка – 291;
  • цыстэрны – 60;
  • беспілотнікі – 3;
  • караблі – 2;
  • сродкі супрацьпаветранай абароны – 5;
  • прыблізна 5300 вайскоўцаў (удакладняецца).

Інфармацыя прыблізная і можа быць удакладненая: яе надзвычай складана атрымаць пасля бою, бо камандзіры арыентуюцца найперш на баі.

08:51

Пачатак валютных гандляванняў на Беларускай валютна-фондавай біржы перанеслі на гадзіну, паведамляюць на сайце біржы.

У беларускіх банках курсы валютаў растуць. Цяпер некаторыя банкі прадаюць долар ЗША па 3,2 рубля, еўра – за 3,55 рубля.

Беларуская валютна-фондавая біржа перанесла на гадзіну валютныя гандляванні

08:45

Інфармацыя ў рэгіёнах раніцай пятага дня вайны

  • Жытомірская вобласць: сірэны гулі ўсю ноч, у цэлым сітуацыя пад кантролем.
  • Кіраваградская вобласць: ноч была адносна спакойная.
  • Валынь: ціха, паветранай сігналізацыі не было.
  • Херсон: ноч у горадзе была ціхая. У Кахоўцы град моцны!
  • Запарожская вобласць: Бярдзянск акупаваны, гарадскія ўлады адмовіліся ад супрацы з акупантамі.
  • Вінніца: адносна спакойна.
  • Хмяльніцкі: была паветраная трывога.
  • Чаркасы: апошняя паветраная сігналізацыя адключылася а 3:00. Раніцаю паветраная трывога аднавілася.
  • У Палтаве адносна ціха.
  • У Чарнаўцах уначы ўпершыню спрацавала паветраная трывога.
  • Луганская вобласць: ноч адносна спакойная, раніцаю 12 адзінак тэхнікі, з іх 4 танкі рушылі ў бок Сватава. Паветраная трывога.
  • Данецкая вобласць: цяжкія баі за Марыупаль і Валнаваху.
  • Тэрнопаль: спакойна.
  • Адэса: ноч у горадзе была адносна спакойная. Сітуацыя ў рэгіёне пад кантролем Узброеных сілаў.
  • Івана-Франкоўск: сітуацыя спакойная.
  • Мікалаеўская вобласць: некалькі разоў была начная трывога, у цэлым сітуацыя стабільная.
  • Дняпро: адносна спакойна, сітуацыя пад кантролем.
  • Харкаўская вобласць: усю ноч адбівалі наступ, знішчалі калоны на подступах да пазіцыяў да таго, як тыя паспелі распачаць артылерыйскі абстрэл Харкава. Горад пад кантролем.
  • Кіеўская вобласць: паветраная трывога, каля Ірпіню горача, на Вышгарадскім напрамку – абстрэлы. Сітуацыю кантралююць Узброеныя сілы.
  • Львоўская вобласць: сітуацыя спакойная.

Перадае «Українська правда» са спасылкаю на афіцыйныя крыніцы.

08:34

Больш за 90 % украінцаў падтрымліваюць прэзідэнта Уладзіміра Зяленскага

Падтрыманне павялічылася ўтрая ў параўнанні са снежнем мінулага года. Упэўненыя, што Украіна зможа разбіць напады расейскіх акупантаў, 70 %, не ўпэўненыя 16 %, сведчыць апытанне, праведзенае ў выходныя сацыялагічнаю групаю «Рэйтынг» на групе з 2000 рэспандэнтаў з усёй Украіны, апроч жыхароў Крыму і падкантрольных паўстанцам раёнаў на ўсходзе Украіны.

08:26

Больш за 400 расейскіх наймітаў дзеюць у Кіеве на загад Крамля, паведамляе «The Times».

Ім даручана забіць прэзідэнта Уладзіміра Зяленскага, чальцоў Кабінету Міністраў і пракласці шлях Маскве да кантролю над горадам. Інфармацыя пра місію вагнераўцаў трапіла ў стол украінскага ўраду ў суботу раніцай, а праз некалькі гадзінаў Кіеў абвясціў каменданцкую гадзіну на 36 гадзінаў, каб ачысціць горад ад расейскіх дыверсантаў. Мэр Клічко папярэдзіў мірных жыхароў, што яны будуць лічыцца дыверсантамі і рызыкуюць быць зліквідаванымі, калі з’явяцца на вуліцах.

08:20

Пацвярджаецца ўчорашняя інфармацыя пра акупацыю Бярдзянску расейскімі войскамі

РАУС расфармавалі, гарадскія ўлады адмовіліся супрацоўнічаць з акупантамі. Падчас захопу гораду адзін чалавек загінуў, яшчэ адзін быў паранены. Спыніўся мясцовы транспарт.

08:14

Аператыўная інфармацыя ад Генштабу Узброеных сілаў Украіны

ЗША ўзмацнілі дастаўку зброі ва Украіну, абвясціўшы ў нядзелю, што адправяць ракеты «Stinger» у межах пакету, ухваленага Белым домам, перадае CNN.

Тым не менш адміністрацыя Байдэна заявіла, што ЗША не будуць дасылаць пяхоты, і амбасадар ЗША ў ААН Лінда Томас-Грынфілд паўтарыла гэтую пазіцыю ў нядзелю.

«Гэта сусветная вайна, калі амерыканцы і Расея пачынаюць страляць адно ў аднаго», – сказаў прэзідэнт Джо Байдэн у пачатку гэтага месяца.

Прэзідэнт ЗША Джо Байдэн падпісаў указ аб увядзенні санкцыяў супраць Расеі ў сувязі з прызнаннем ЛНР і ДНР. 22 лютага 2022 года. Фота: twitter.com/POTUS

У той час як ЗША маюць тысячы вайскоўцаў па ўсёй Еўропе, яны там не для барацьбы з расейцамі, а для абароны саюзнікаў з NATO, заявіў Байдэн у чацвер.

07:48

Расейскія апазіцыянеры зарганізавалі Антываенны камітэт, які будзе змагацца «з агрэсіўнаю дыктатурай Уладзіміра Пуціна», паведамляе «Вот так».

У склад камітэту ўвайшлі палітыкі Дзмітрый Гудкоў, Міхаіл Хадаркоўскі, Гары Каспараў, Уладзімір Кара-Мурза, прадпрымальнікі Барыс Зімін і Яўген Чычваркін, эканамісты Сяргей Аляксашанка і Сяргей Гурыеў, журналіст Яўгеній Кісялёў, а таксама пісьменнік Віктар Шэндэровіч, прызнаны расейскімі ўладамі замежным агентам.

«Мы нясем маральную адказнасць за тое, што не змаглі перадухіліць вайны, што дапусцілі вераломны напад расейскіх войскаў на суседнюю краіну», – гаворыцца ў першай заяве камітэту.

07:41

Украінская дэлегацыя толькі што прыбыла ў Беларусь на перамовы з Расеяй.

07:39

Праз 10 дзён на тэрыторыі Беларусі можа з'явіцца атамная зброя!

ЦВК Беларусі абвясціла прыняцце паправак у Канстытуцыю па выніках рэферэндуму.

Раней паведамлялі, што Лукашэнка дапускае размяшчэнне расейскіх атамных узбраенняў у выпадку зʼяўлення такіх жа ўзбраенняў у Польшчы. Пазней БелТА са спасылкаю на прэс-службу кіраўніка краіны паведаміла, што Беларусь не стане размяшчаць на сваёй тэрыторыі атамнага ды звычайнага ўзбраення ў выпадку, калі насельніцтва краіны «не будуць душыць». Пра гэта заявіў Лукашэнка ў тэлефоннай гутарцы з прэзідэнтам Францыі Эманюэлем Макронам.

Пасля распаду СССР Беларусь была восьмаю краінай у свеце паводле запасаў атамнай зброі. Яна стала першаю дзяржавай, якая добраахвотна ад яе адмовілася.

07:22

Reuters: Расея да гэтага часу выпусціла больш за 350 ракетаў па ўкраінскіх аб’ектах, некаторыя з іх патрапілі ў грамадзянскую інфраструктуру. Але яна дасюль не разгарнула каля траціны войскаў, якія Пуцін размясціў каля сваіх межаў Украіны.

Спосаб наступлення расейцаў на ўкраінскі горад Чарнігаў на поўнач ад Кіева сведчыць пра тое, што Расея можа прыняць тактыку аблогі – акружэнне пазіцыяў праціўніка, адсяканне шляхоў забеспячэння ды эвакуацыі, затым атаку з дапамогай абʼяднаных сілаў бранятэхнікі, сухаземных войскаў ды інжынераў і нацэльванне на грамадзянскую інфраструктуру і шкоду цывільным асобам».

06:57

Расея задзеяла ў нападзе на Украіну каля 100 тысяч вайскоўцаў. У Пэнтагоне лічаць, што ў рэзерве цяпер застаюцца яшчэ каля 50 тысячаў расейскіх вайскоўцаў, піша ўкраінская служба Бі-Бі-Сі.

06:53

З моманту ўварвання Расеі ва Украіну загінулі 352 цывільныя асобы, сярод іх 14 дзяцей. Яшчэ 1684 асобы параненыя, сярод іх – 116 дзяцей, паведамляе МУС Украіны.

Міністэства абароны Украіны інфармуе, што на тэрыторыі краіны загінулі 4300 расейскіх вайскоўцаў. Раней Расея паведамляла, што ахвяраў няма. Але 27 лютага прызнала, што расейскія вайскоўцы гінуць ва Украіне, але Мінабароны РФ колькасць ахвяраў не агучвае.

06:48

Беларусь можа накіраваць сваіх вайскоўцаў ва Украіну 28 лютага. Такім чынам войскі Беларусі возьмуць удзел у агрэсіі Расеі супраць Кіева, паведамляе выданне «Washington Post» са спасылкаю на крыніцу ў Белым доме.

«Гэта ясна, што Менск цяпер – працяг Крамля», – сказаў прадстаўнік адміністрацыі Байдэна.

 

06:44

Расейскі рубель моцна дэвальвуе. На тле інфармацыі пра санкцыі, курс рубля абваліўся больш чым на 30 % супраць долара і еўра. Цяпер курс рубля вырас з 115 да 108 рублёў за долар. Курс еўра дасягаў 125 рублёў, цяпер 120.

06:40

Камандуючы кіеўскай абаронай паведамляе, што расейскія войскі намагаюцца прарваць абарону сталіцы.

«Усе спробы расейскіх акупацыйных войскаў дасягнуць пастаўленай мэты праваліліся. Былі знішчаныя калоны тэхнікі акупанта. Вораг зазнаў значныя страты ў асабовым складзе. Расейскія войскі дэмаралізаваныя і знясіленыя. Мы паказалі, што ўмеем абараніць свой дом ад няпрошаных гасцей», – заявіў камандуючы сухаземнымі войскамі Узброеных сілаў Украіны, камандуючы абаронаю Кіева генерал-палкоўнік Аляксандр Сырскі.

Сітуацыя ў Кіеве цяпер пад кантролем.

06:25

Прэзідэнт ЗША Джо Байдэн склікае нараду аб сітуацыі ва Украіне. У паседжанні возьмуць удзел кіраўнікі Канады, Брытаніі, Францыі, Нямеччыны, Італіі, Японіі, Польшчы, Румыніі, а таксама кіраўніцтва Еўразвязу і NATO, піша CNN.

06:20

У Кіеве паветраная трывога. Працуе СПА, паведамляе УНІАН.

Падпісвайся на telegram Белсату

Hавiны