Табакрыгаход! Літоўскія памежнікі вылавілі кантрабандныя цыгарэты ў фальшывых крыгах
Памежнікі выявілі 9 плытоў, замаскаваных пад лёд. Цыгарэтаў там было на 50 тысяч еўра.
Літоўская памежная служба расказала пра крэатыўны спосаб кантрабанды цыгарэт з Беларусі: у плытах, замаскаваных пад крыгі.
Тры падазроныя аб’екты ў Нёмане пабачылі з паветра вечарам 23 снежня. Аказалася, гэта былі плыты з запакаванымі ў поліэтылен пачкамі цыгарэт марак «Fest», «NZ Gold» і «Minsk», а таксама GPS-трэкеры або мабільныя тэлефоны.
Яшчэ пяць такіх плытоў вылавілі 25 снежня. Яны ўжо былі замаскаваныя пад крыгі граззю, лёдам і снегам.
У нядзелю, 26 снежня, вылавілі яшчэ адзін «тытунёвы плыт». Агулам памежнікі налічылі 754 блокі цыгарэт у 9 плытах, іх ацанілі ў 50 тысяч еўра.
Памежнікі кажуць, такі спосаб кантрабанды ім добра знаёмы: цыгарэты спускаюць у ваду ў Беларусі і спадзяюцца, што Нёман вынесе груз у Літву, дзе кантрабандысты знойдуць цыгарэты праз GPS-маякі.
АА belsat.eu
