«Белсат» падводзіць вынікі 27 лістапада. 474 дні пасля выбараў беларусы выказваюць пратэст. За кратамі з палітычных прычынаў тысячы чалавек, у тым ліку 887 прызнаных палітычнымі зняволенымі кансэнсусным рашэннем беларускіх праваабаронцаў.
Святлана Ціханоўская абвясціла 27 лістапада Днём салідарнасці з беларускімі палітвязнямі. Акцыю падтрымалі не толькі беларусы: салідарнасць з беларускімі палітычнымі зняволенымі выказалі прэзідэнт Польшчы, Дзяржаўны дэпартамент ЗША, прэм’ер Славеніі, міністры замежных справаў Аўстрыі, Латвіі, Славакіі, Еўрапейская служба вонкавых сувязяў, мноства дэпутатаў краінаў Еўразвязу. Часовы павераны ЗША ў Беларусі сустрэўся з сем’ямі палітвязняў.
Міграцыйны крызіс прайшоў самую вострую фазу, але не спыніўся. З Беларусі ў Ірак вярнуліся ўжо каля 1,5 тысячы мігрантаў. Ды Польшча перадухіліла спробу прарыву мяжы ў раёне Белавежы, двое жаўнераў атрымалі раненні. Літва не выключыла, што з Беларусі пойдуць узброеныя талібы.
Рэпрэсіі не спыняюцца ні на дзень. Фрылансера радыё «Свабода» арыштавалі на 10 дзён за «дробнае хуліганства». Рэжысёра Валера Мазынскага пазбавілі пенсіі за асаблівыя заслугі перад Беларуссю. 27-гадовага жыхара Берасця пазбавілі беларускага грамадзянства, хоць ён нарадзіўся і вырас у Беларусі. «Кіберпартызаны» паказалі, як улады прапаноўвалі шантажаваць пратэстоўцаў дзецьмі.
Навукоўцы тым часам непакояцца праз новы штам каронавіруса, які атрымаў назву о-мікрон. Яго лічаць самым небяспечным з усіх. У шэрагу еўрапейскіх краінаў ужо выявілі першыя выпадкі заражэння нечым, што можа быць тым новым штамам. Пачынаюць спыніць авіязлучэнне з краінамі поўдня Афрыкі, дзе той штам выявілі. Ці будуць наяўныя вакцыны эфектыўныя супраць гэтага штаму, невядома, але навукоўцы ўжо працуюць над новымі.
Беларусы тым часам хварэюць і паміраюць ад «папярэдняга» штаму Дэльта. Сёння стала вядома, што не стала журналіста і палітычнага аглядальніка Рамана Якаўлеўскага, які правёў тыдзень у шпіталі праз каронавірус.
Дзякуй, што чытаеце і глядзіце нас! Даруйце, калі сайт кепска працуе: на нас вядуць DDoS-атаку. Калі што, шукайце нас у сацсетках, чытайце праз мабільны дадатак або глядзіце на Youtube ці праз спадарожнік.
АА belsat.eu
