Сваякі Лукашэнкі мэтанакіравана ладзяць паездкі мігрантаў да межаў Беларусі з Еўразвязам, заявіў у сераду 27 кастрычніка дзяржаўны сакратар па еўрапейскіх справах пры МЗС Францыі Клеман Бон, піша «Deutsche Welle».
Паводле дыпламата, мэта беларускага боку – аслабіць і раз’яднаць Еўразвяз.
Імёны чальцоў сям’і Лукашэнкі, датычных да перавозак мігрантаў, французскі дыпламат не называў.
Лукашэнка хоча заманіць Еўразвяз у пастку, калі сцвярджае, што Еўропа парушае ўласныя прынцыпы, лічыць Бон. Прадстаўнік МЗС Францыі заклікаў дзейнічаць «рашуча і гуманна» у сітуацыі на польска-беларускай мяжы.
У траўні бягучага году Лукашэнка заявіў, што больш не будзе стрымліваць плынь уцекачоў з Усходу, якія накіроўваюцца ў краін ЕЗ. Пасля гэтай заявы рэзка павялічылася колькасць мігрантаў, якія спрабавалі трапіць у Еўразвяз з тэрыторыі Беларусі. Спачатку дзясяткі, а потым сотні мігрантаў штодня спынялі літоўскія памежнікі. Потым уцекачы накіраваліся ў Латвію і Польшчу. За некалькі месяцаў міграцыйнага крызісу загінулі дзевяць чалавек. Польшча і Літва будуюць на мяжы з Беларуссю агароджы з калючага дроту.
ААН абвінавачвае краіны Еўразвязу і Беларусь у парушэнні Канвенцыі 1951 году аб уцекачах і заклікае даць прытулак мігрантам і забяспечыць рэалізацыю іхных правоў.
Брусель абвінавачвае Менск у наўмысным правакаванні міграцыйнага крызісу ў адказ на санкцыі, уведзеныя супраць рэжыму Лукашэнкі. Цяпер ЕЗ рыхтуе пяты пакет санкцыяў у дачыненні рэжыму з-за выкарыстання ім мігрантаў у якасці інструменту супраць Еўразвязу.
ГГ, belsat.eu