Лукашэнка пахваліўся экспартам калію. Статыстыка пра яго закрытая ўжо два месяцы

Вагон кампаніі «Беларуськалій». Клайпеда, Літва. 11 жніўня 2021 года. Фота: Белсат

Аляксандр Лукашэнка 27 жніўня на цырымоніі ўвядзення ў эксплуатацыю Петрыкаўскага горна-абагачальнага комплексу «Беларуськалію» пахваліўся вынікамі працы кампаніі, статыстыка пра якую хаваюць ужо два месяцы.

«Калій – брэнд нашай краіны. Нам пашанцавала, што айчынныя нетры багатыя чырвоным золатам. Попыт на яго велізарны і расце з года ў год. «Беларуськалій» – адзін з галоўных гульцоў на сусветным рынку ўгнаенняў, вырабляе і прадае больш за 20 % калійных угнаенняў. Але самае галоўнае, што гэта самы надзейны партнёр у свеце», – цытуе Лукашэнку БелТА.

Еўразвяз узгадніў сектаральныя санкцыі супраць рэжыму Лукашэнкі

Паводле яго, «Беларуськалій» не падводзіць нават ва ўмовах санкцыяў.

Адзначым, што ў чэрвені Нацыянальны статыстычны камітэт Беларусі перастаў публікаваць штомесячныя аператыўныя звесткі пра экспарт нафтапрадуктаў і калійных угнаенняў у разрэзе кодаў ТН ЗЭД ЕАЭС. Раней адпаведныя звесткі штомесяц публікаваліся на сайце Белстату.

Літва можа спыніць транзіт беларускага калію праз сваю тэрыторыю

Адбылося гэта пасля таго, як 24 чэрвеня Еўразвяз увёў сектаральныя санкцыі супраць уладаў Беларусі. Яны прадугледжваюць у тым ліку забарону на гандаль і транзіт асобных відаў калійных угнаенняў, нафтапрадуктаў, тытунёвых вырабаў, забарону на доступ беларускага ўраду і дзяржаўных банкаў на фінансавы рынак Еўропы. У частцы нафтапрадуктаў і калійных угнаенняў санкцыі не распаўсюджваюцца на кантракты, заключаныя да 25 чэрвеня.

Публікацыя інфармацыі пра нафтапрадукты і калійныя ўгнаенні канчаецца справаздачнасцю за студзень – красавік 2021 года.

«Yara» вырашыла перагледзець супрацу з «Беларуськаліем»

Якія афіцыйныя лічбы?

Паводле агучаных на адкрыцці петрыкаўскага комплексу лічбаў, «Беларуськалій» значна нарасціў вытворчасць, але рост валютнай выручкі прадэманстраваў больш сціплы вынік.

Вытворчасць калійных угнаенняў «Беларуськалію» за 7 месяцаў склала 7,546 мільёна тонаў, што на 16,6 % больш у параўнанні з аналагічным перыядам мінулага года.

Але экспартная выручка за гэты ж перыяд павялічылася толькі на 13,4 %. А экспарт калію ў фізічным выражэнні склаў 6,98 мільёна тонаў, што на 655 тысяч тонаў, або толькі на 10,4 % больш у параўнанні з аналагічным перыядам мінулага года.

Незапатрабаваная на замежных рынках прадукцыя засталася ў краіне. На ўнутраны рынак за 7 месяцаў 2021 года адгрузілі 625 тысяч тонаў, што на 65,5 % больш да аналагічнага перыяду мінулага года, піша «Экономика Беларуси».

МГ belsat.eu

Падпісвайся на telegram Белсату

Hавiны