Ужо два гады ў Беларусі штодзень – палітычныя затрыманні і суды. «Белсат» вядзе хроніку рэпрэсіяў. Вось што стала вядома за адзін толькі дзень 27 ліпеня.
Мікалай Аўтуховіч трымае галадоўку ад 11 ліпеня – ужо сямнаццаты дзень. Учора ён упаў ад слабасці па дарозе ў суд. Працягваюцца катаванні фігурантаў «справы Аўтуховіча», піша «Dissidentby», у тым ліку адмаўляюць у медычнай дапамозе і адбіраюць патрэбныя лекі.
Ранкам 27 ліпеня затрымалі старшыню Аб’яднанай грамадзянскай партыі Мікалая Казлова, ягоную намесніцу Антаніну Кавалёву і старшыню Менскай гарадской арганізацыі АГП Аксану Аляксееву. Кавалёва і Аляксеева ў ізалятары на Акрэсціна, супраць Казлова – крымінальная справа за «дзеянні, якія груба парушаюць грамадскі парадак». Паводле звестак праваабаронцаў «Вясны», Казлова наведаў адвакат, затрыманы ва ўпраўленні Следчага камітэту.
Магілёўскага 40-гадовага архітэктара Аляксея Парэцкага асудзілі на тры гады калоніі агульнага рэжыму за «Паклёп на Лукашэнку» і «Распальванне варожасці» (ч.2 арт. 367 і ч.1 арт. 130 КК РБ), піша «Mayday». Парэцкі быў у «тэрарыстычным спісе» Камітэту дзяржаўнай бяспекі, але да суду быў толькі пад падпіскай аб нявыездзе – пад варту яго ўзялі пасля агучвання выраку
У Баранавічах асудзілі двух супрацоўнікаў авіярамонтнага заводу: 31-гадовага Яўгена Ярмака і 27-гадовага Юрыя Азімку, піша «Вясна». У сярэдзіне сакавіка байцы ГУБАЗіК ладзілі ў горадзе палітычны «рэйд» падчас якога ў Ярмака знайшлі яшчэ і гашыш. Ярмака асудзілі за «абразу» каментарамі ў інтэрнэце чатырох міліцыянтаў і суддзі, за незаконны абарот наркотыкаў (артыкулы 369 і 391, ч. 1 і 2 арт. 328 КК РБ) на 5 гадоў калоніі ўзмоцненага рэжыму і штраф у 3200 рублёў. Ён прызнаў віну ва ўсім акрамя другой часткі 328-га артыкулу. Ярмак пад ціскам расказаў сілавікам, што купляў гашыш для сябе і свайго калегі Азімкі – другога асудзілі на два з паловай гады абмежавання волі без накіравання ў папраўчую ўстанову («хатняя хімія»).
Палітвязню Міхаілу Добышу замянілі пакаранне на больш жорсткае, перавядуць з «хіміі» (установы адкрытага тыпу) у калонію. Яго асудзілі на 10 месяцаў «хіміі» за тое, што ён нібыта пагражаў гвалтам міліцыянту ў прадуктовай краме.
У Гомлі проста на працоўным месцы затрымалі Алену Кравец, якую ўжо затрымлівалі за ўдзел у пратэстах 2020 года, піша «Гомельская вясна». Цяперашняе затрыманне звязваюць з падпіскамі на «экстрэмісцкія» каналы. У Менску на працоўным месцы затрымалі 43-гадовую Тамару Міцюкевіч – за каментары ў суполцы «Карнікі Беларусі». У Горадні затрымалі ўладальніка гатэлю для сабак Паўла Свірбутовіча. На відэа сілавікоў бачна, што яго хапалі людзі ў вайсковым адзенні без апазнавальных знакаў. У «пакаянным відэа» ён кажа, што нібыта распаўсюджваў «экстрэмісцкія» матэрыялы і матэрыялы з «абразамі Лукашэнкі», рэпосціў персанальныя звесткі сілавікоў.
Завершанае расследаванне крымінальнай справы супраць 45-гадовага бабруйскага тыктокера Андрэя Бяляўскага. Яго абвінавачваюць у «абразе Лукашэнкі» паводле арт. 368 КК РБ. У Гомельскім абласным судзе разглядаюць справу ІТ-спецыяліста Андрэя Уткіна, пракурор просіць для яго два гады калоніі агульнага рэжыму за перадачу праекту «Беларускі гаюн» фота расейскай вайсковай тэхнікі.
Ёсць і добрыя навіны: на волю выйшлі палітвязні Сяргей Красоўскі і Вольга Сыраватка, якія цалкам адбылі пакаранне. Красоўскі – індывідуальны прадпрымальнік з Берасця, якога асудзілі на два гады калоніі агульнага рэжыму за вывешванне лялькі-пудзіла з надпісам «АМАП». Сыраватка – берасцейка, якую за тое ж пудзіла, а таксама за «пашкоджанне шкла ў аддзяленні міліцыі» асудзілі на тыя ж два гады калоніі агульнага рэжыму.
Ужо трыста еўрапейскіх дэпутатаў узялі статус «хросных» палітвязняў Беларусі ў межах кампаніі #WeStandBYyou. Трэцюю сотню закрыла нямецкая дэпутатка партыі «Саюз 90/Зялёныя» Брыта Гасэльман – яна цяпер «хросная» для хворага на рак Паўла Кучынскага, якога асудзілі на пяць гадоў калоніі ўзмоцненага рэжыму за «абразы» і «пагрозы».
Тым часам намеснік міністра замежных справаў Беларусі Юрый Амбразевіч на Пекінскім форуме правоў чалавека прапанаваў «у далейшым весці гаворку пра дэсакралізацыю канцэпцыі правоў чалавека ў міжнародных адносінах як утопіі, якая не паддаецца рэалізацыі на практыцы».
А ў нас юбілей: год таму наш сайт і нашыя сацсеткі прызналі «экстрэмісцкімі».
Алесь Наваборскі belsat.eu
