Ад пачатку поўнамаштабнай вайны ва Украіне расейцы разбудоўваюць сетку вязніц і «фільтрацыйных» лагераў. Тых, хто праходзіць «фільтрацыю», гвалтоўна вывозяць да Расеі і часам прымушаюць далучацца да расейскіх войскаў. Тых, хто пярэчыць акупантам, катуюць.
Пра гэта расказала 27 ліпеня прэс-служба міністра-каардынатара спецыяльных службаў Польшчы. «Фільтрацыйныя» лагеры там называюць часткай спробы знішчэння ўкраінскай нацыі. Адказнымі называюць афіцэраў расейскай Федэральнай службы бяспекі.
Дзе атрымліваецца, расейцы выкарыстоўваюць украінскія турмы і будынкі мясцовых уладаў, аддзяленні паліцыі і міграцыйнай службы. Але часам «фільтрацыйныя» лагеры ствараюць у форме мястэчак і намётавых лагераў.
Некаторыя «фільтрацыйныя» лагеры ўдалося ідэнтыфікаваць: польскія спецслужбы апублікавалі дакладныя каардынаты будынкаў у Данецку, Дакучаеўску, Мангушы, Новаазоўску, Старабэшаве.
Паводле звестак польскіх спецслужбаў, працэс «фільтрацыі» трывае ад некалькіх гадзінаў да некалькіх дзён. У час гэтага супрацоўнікі ФСБ ладзяць допыты, аналізуюць канфіскаваныя рэчы і сховішчы інфармацыі, праглядаюць сацсеткі зняволеных. На целах зняволеных шукаюць сляды раненняў і правяраюць татуяванні.
«Калі нехта выклікае хаця б цень падазрэння, ён становіцца аб’ектам рэпрэсіяў, якія могуць скончыцца смерцю, – сцвярджаюць польскія спецслужбы. – Страшны лёс чакае і тых, каму пасля «станоўчай праверкі» загадаюць ваяваць у шэрагах агрэсара».
Колькі людзей прайшло праз «фільтрацыю», дакладна невядома, але польскія спецслужбы прыблізна ацэньваюць у паўтара мільёна колькасць тых, хто прайшоў праз фільтрацыйныя лагеры. У гэты лік уваходзяць і дзеці. Большасць тых, хто прайшоў «фільтрацыю», прымусова вывезеныя ў Расею.
Алесь Наваборскі belsat.eu
