Калі такое рашэнне сапраўды прымуць, мяжа будзе закрытай і для беларусаў. Вырашаць будуць Сейм, урад і прэзідэнт.
Міністарка ўнутраных справаў Літвы Агне Білатайце расказала, што МУС Літвы прапанавала ўраду ацаніць сітуацыю з нелегальнай міграцыяй праз мяжу з Беларуссю і, магчыма, абвясціць надзвычайнае становішча, піша Delfi.
Рашэнне аб надзвычайным становішчы мае прымаць Сейм (парламент) Літвы, але пакуль ён не на сэсіі, прэзідэнт можа прыняць такое рашэнне і склікаць пазачарговую сэсію Сейму, каб той зацвердзіў ці адхіліў рашэнне.
Калі ўлады прымуць такое рашэнне, то Літва не будзе абавязанай упускаць мігрантаў, а ў ахову мяжы будзе актыўна ўцягнутае войска. Зрабіць гэта прапануюць так, каб усе правы і свабоды грамадзянаў Літвы захоўваліся, але мяжа з Беларуссю будзе, па сутнасці, закрытай.
Старшыня камітэту нацыянальнай бяспекі і абароны Сейму Літвы Лаўрынас Касчунас адзначыў, што трэба «разглядаць усе варыянты», і надзвычайнае становішча – адна з опцыяў.
Лідар парламенцкай апазіцыі Саўлюс Сквярняліс падтрымаў ідэю аб надзвычайным становішчаы, але адзначыў, што для гэтага патрэбная шырокая палітычная згода і праца з грамадскасцю.
АА belsat.eu
