У Кішынэве суд разгледзеў пытанне пра меру стрымання для былога прэзідэнта Малдовы Ігара Дадона. Хадайніцтва пракуратуры аб змяшчэнні яго пад варту ў ізалятар было адхіленае, але палітык адпраўляецца на 30 содняў пад хатні арышт, паведамляе «Newsmaker».
Брат жонкі Дадона Пэтру Мэрыняну, які праходзіць у справе як саўдзельнік, на той жа тэрмін адпраўлены пад варту.
Пракуратура збіраецца аспрэчваць рашэнне суда і дамагацца адпраўкі Дадона ў ізалятар. Як мяркуецца, ёсць рызыка таго, што былы прэзідэнт, застаючыся ўдома, можа знішчыць доказы і паўплываць на людзей, якія маюць дачыненне да справы.
Паводле пракурораў, Ігару Дадону пагражае да 20 гадоў пазбаўлення волі. Сам ён кажа пра пераслед з палітычных матываў.
Справу супраць Дадона Генпракуратура Малдовы распачала 18 траўня, яго западозрылі ў атрыманні хабару ад малдаўскага бізнесмена Уладзіміра Плахатнюка. Падставай паслужылі відэазапісы 2019 года, на якіх відаць, як Плахатнюк спрабаваў перадаць Ігару Дадону, у той час дзейнаму прэзідэнту, чорны пакет. Палітык пакету не ўзяў, але сказаў: «Ізноў вы з кулькамі. Аддайце Косцю».
Пасля публікацыі відэа пачалося расследаванне, але пракуратура не знайшла складу злачынства.
Дадон назваў здымку з пакетам правакацыяй з боку Плахатнюка і адмаўляе ўсе абвінавачванні.
Макар Мыш belsat.eu