Прэс-сакратар МЗС Беларусі Анатоль Глаз у эфіры дзяржаўнага тэлебачання распавёў падрабязнасці ліста, які кіраўнік ведамства Уладзімір Макей даслаў заходнім калегам.
Ліст 14 красавіка журналіст радыё «Свабода» Рыкард Юзьвяк апублікаваў ліст Уладзіміра Макея на адрас прадстаўнікоў еўрапейскіх МЗС. У дакуменце за 6 красавіка міністр прасіў ЕЗ падтрымаць свой суверэнітэт і незалежнасць. А «ледавіковы перыяд» паміж бакамі, паводле яго, сталі вынікам «несуцяшальнай чарады падзеяў, якія рушылі пасля 2020 года». Ніякіх канкрэтных крокаў з боку афіцыйнага Менску Макей не прапаноўваў.
Каментуючы ліст, Глаз заявіў, што ва ўладаў Беларусі не было «вялікіх ілюзіяў у дачыненні таго, што нашае запрашэнне да нармальнасці будзе належным чынам успрынятае».
«Але працягнуць руку – гэта быў наш дыпламатычны абавязак, які мы выканалі», – адзначыў прэс-сакратар.
Паводле яго, «міністр напісаў такіх лістоў некалькі дзясяткаў сваім калегам». Але пазітыўнай рэакцыі не было ні ад каго.
«А той, хто зліў дыпламатычны дакумент у СМІ, паказаў свой узровень прафесіяналізму, такту, жадання нешта вырашаць. І зусім нас не здзівіў», – заявіў Глаз.
Пры гэтым прэс-сакратар зноў прыгразіў Еўразвязу: калі той не пойдзе на саступкі Менску, «Еўрапейскага Звязу ў Беларусі будзе рабіцца ўсё менш».
ПС belsat.eu