У Полацку затрымалі 21-гадовую студэнтку, яе вінавацяць у «абразе прадстаўніка ўлады»
Студэнтка Полацкага дзяржаўнага ўніверсітэту Аляксандра Бука змешчаная ў ізалятар часовага ўтрымання. Пра гэта піша TUT.by.
Як распавяла TUT.by маці студэнткі, да дзяўчыны прыйшлі з ператрусам, калі яна вярнулася ў інтэрнат з заняткаў.
«Яна паспела мне пра гэта паведаміць па тэлефоне. Ад яе сяброў я даведалася, што пры ператрусе ў дачкі канфіскавалі тэхніку, магчыма, нешта яшчэ. Пазней атрымалася высвятліць, што Алеся затрыманая да 72 гадзін па падазрэнні ў здзяйсненні злачынства па артыкуле 369 КК (»Абраза прадстаўніка ўлады«). Яна знаходзіцца ў ІЧУ», – распавяла Юлія Бука.
Аляксандра вучыцца на 4 курсе гуманітарнага факультэту Полацкага дзяржуніверсітэта, на спецыяльнасці «рамана-германская філалогія».
Дзяўчына мае актыўную грамадзянскую пазіцыю. У кастрычніку яна разам з іншымі студэнтамі ПДУ ўдзельнічала ў відэазвароце супраць беззаконня і гвалту ў Беларусі пасля выбараў. У сакавіку Аляксандра Бука і яшчэ трое студэнтаў ПДУ ўдзельнічалі ва флэш-мобе, прысвечаным палітвязням: на знак салідарнасці з імі маладыя людзі пагалілі галовы.
Паводле праваабаронцаў, з лета 2020 года адбываюцца самыя масавыя ў найноўшай гісторыі Беларусі рэпрэсіі. Са жніўня былі распачатыя больш за 2400 крымінальных справаў, звязаных з пратэстамі, 302 чалавека па стане на 26 сакавіка прызнаныя палітвязнямі. Тысячы пратэстоўцаў па ўсёй краіне сталіся ахвярамі мэтанакіраваных катаванняў, больш за 33 тысячы чалавек былі затрыманыя ў адміністратыўным парадку. Паводле розных ацэнак, ад 4 да 10 асобаў загінулі ў выніку дзеянняў сілавікоў. Пры гэтым ні за катаванні, ні за забойствы да адказнасці нікога не прыцягнулі.
ІІ belsat.eu
