Дзяржаўнае інфармацыйнае агенцтва «БелТА» на сайце і ў сацыяльных сетках паведаміла днём 26 лістапада аб смерці міністра замежных справаў Беларусі Уладзіміра Макея. Гэта пацвердзіла Міністэрства замежных справаў.
Уладзімір Макей «раптоўна памёр», сцвярджае «БелТА» са спасылкай на прэс-сакратара МЗС Беларусі Анатолія Глаза. Іншых падрабязнасцяў не публікуюць.
Прэс-служба МЗС не адказвае на тэлефанаванні. У прыёмнай МЗС «Белсату» сказалі, што «пакуль не могуць пацвердзіць гэтую інфармацыю.
Абноўлена. Беларуская філія расейскага дзяржаўнага выдання «Спутник» сцвярджае, што Глаз пацвердзіў смерць Макея і сказаў: «Некалькі гадзін таму раптоўна сканаў… Нічога не прадвяшчала. Яшчэ ўчора абмяркоўвалі планы на тыдзень… Вялікая страта для ўсіх нас».
Абноўлена. Міністэрства замежных справаў Беларусі напісала пра смерць Макея ў афіцыйным Twitter-акаўнце. Ананімны Telegram-канал «Пул первого», які выконвае функцыі прэс-службы Аляксандра Лукашэнкі, паведаміў, што Лукашэнка выказаў спачуванні родным і блізкім Макея з прычыны смерці.
Яшчэ 25 лістапада Макей сустракаўся з Апостальскім Нунцыем (амбасадарам Ватыкану) Антэ Ёзычам. 23 лістапада Макей лётаў у Ерэван на саміт Арганізацыі дамовы калектыўнай бяспекі. Беларускую дэлегацыю туды даставілі транспартным ваенна-транспартным самалётам Іл-76МД, не прызначаным для звычайных перавозак пасажыраў: напрыклад, на такіх самалётах не прадугледжаныя туалеты.
Уладзіміру Макею было 64 гады. Ён нарадзіўся 5 жніўня 1958 года ў Некрашэвічах, што ў Карэліцкім раёне Гарадзенскай вобласці. Ад 1993 года быў на дыпламатычнай службе, прайшоў шлях ад трэцяга сакратара ўпраўлення інфармацыі і гуманітарнай супрацы да начальніка ўпраўлення агульнаеўрапейскай супрацы. У 2000-2008 гадах быў памочнікам Аляксандра Лукашэнкі, у 2008 годзе ўзначаліў ягоную адміністрацыю. У 2012 годзе быў прызначаны міністрам замежных справаў, якім заставаўся дагэтуль.
Да пратэстаў 2020 года некаторыя лічылі Макея празаходнім ці лібералам (адзначалі як адносна мяккую рыторыку, так і любоў да вышыванак), але ў час пратэстаў Макей цалкам падтрымаў Лукашэнку і ізаляцыю ад Заходняй Еўропы.
На перадавіцах сайтаў дзяржаўных медыяў навіна пра смерць Макея – не сярод галоўных. Так, на «БелТА» галоўныя навіны – нарада Лукашэнкі аб аграпрамысловым комплексе, выказванні Лукашэнкі аб харчовай бяспецы і выказванні віцэ-прэм’ера пра даходнасць прадпрыемстваў, толькі пад гэтымі навінамі – смерць міністра замежных справаў і прагноз надвор’я. На «СБ. Беларусь сегодня» смерці Макея не знайшлося месца сярод сямі галоўных навінаў.
Алесь Наваборскі belsat.eu
