Браты Дзмітрый і Уладзімір Каракіны знаходзяцца ў Следчым ізалятары № 1 у Менску, піша праваабарончы цэнтр «Вясна». Пра іх затрыманне паведамлялі 13 кастрычніка – цяпер стала вядома, што супраць іх распачалі крымінальную справу.
Паводле папярэдняй інфармацыі праваабаронцаў, справу супраць Дзмітрыя і Уладзіміра Каракіных распачалі паводле арт. 342 КК РБ («Актыўны ўдзел у групавых дзеяннях, якія груба парушаюць грамадскі парадак»).
Калі праўладныя каналы, звязаныя з сілавікамі, паведамлялі аб затрыманні, братоў на словах вінавацілі ва ўдзеле ў акцыях пратэсту, «агітацыі» ў сацыяльных сетках і «супрацы з экстрэмісцкімі арганізацыямі». Сцвярджалася, нібыта ў доме знайшлі «арсенал незарэгістраванай зброі», які чамусьці прыпісалі не музыкам, а іхнаму бацьку. Музыкаў затрымлівалі байцы САХР у поўным экіпаванні.
«Litesound» – поп-рок гурт, які браты Каракіны заснавалі ў 2005 годзе. Гурт выдаў толькі два студыйныя альбомы, але чатыры дзясяткі самотнікаў. Вядомы пераважна англамоўнымі песнямі, але мае спевы на беларускай і расейскай. Двойчы займалі другое месца ў нацыянальным адборы на «Еўравізію» (2008 і 2009), перамаглі ў адборы туды ў 2012 годзе, але занялі толькі 15-е месца ў паўфінале «Еўравізіі» з песняй «We Are The Heroes».
У 2020 годзе выдалі песні ў падтрымку беларускіх пратэстаў, затым гралі ў падтрымку сем’яў палітвязняў.
Алесь Наваборскі belsat.eu