Прэм’ер-міністр Польшчы Матэўш Маравецкі прыехаў у Кіеў, паведамляе польскі ўрад у сваіх сацсетках. Гэта чацвёрты ягоны візіт ва Украіну ад пачатку вайны. Ён назваў Кіеў «еўрапейскай сталіцай свабоды».
Прэмʼер-міністр Польшчы Матэўш Маравецкі прыехаў ва Украіну з чацвёртым візітам ад пачатку вайны. Ён ушанаваў памяць ахвяраў Галадамору, заявіўшы, што цяперашнія дзеянні Расеі могуць прывесці да яшчэ аднаго штучнага голаду, гэтым разам – у Афрыцы і Паўднёва-ўсходняй Азіі.
Як сказаў Маравецкі, блакаванне Расеяй украінскіх партоў азначае блакаванне гуманітарных магчымасцяў, і бакі працягнуць працу, каб вызваліць гэтыя калідоры.
Пазней у Кіеве адбылася сустрэча Люблінскага трохкутніка – прэмʼер-міністраў Украіны, Польшчы і Літвы. Дзяніс Шмыгаль, Матэўш Маравецкі і Інгрыда Шыманіце ўхвалілі сумесную заяву, асудзіўшы сістэматычныя ваенныя злачынствы Расеі, пацвердзілі далейшую трохбаковую супрацу ў ваеннай і абароннай галіне з выкарыстаннем патэнцыялу NATO і ЕЗ. Кіраўнікі ўрадаў дамовіліся і надалей прасіць партнёраў працягваць пастаўкі Украіне тэхнікі ды ўзбраення.
Таксама яны пацвердзілі гатовасць актывізаваць дыскусію ў NATO адносна запрашэння Украіны да перамоваў аб уступленні ў альянс з улікам саміту арганізацыі ў Вільні ў 2023 годзе. Літва і Польшча выказалі надзею на найхутчэйшы адчувальны прагрэс на гэтым шляху.
Урады трох краінаў заклікалі міжнародную супольнасць вызначыць выразнай агульнай мэтай аднаўленне тэрытарыяльнай цэласнасці Украіны і вызваленне ўсіх акупаваных тэрыторыяў.
У заяве для журналістаў Матэўш Маравецкі адзначыў, што ў выпадку, калі вайну прайграе Украіна, загіне ўся Еўропа.
«Кіеў цяпер – еўрапейская сталіца свабоды. У вайны, якую развязала Расея, можа быць толькі адзін вынік: або Украіна пераможа, або ўся Еўропа загіне. На жаль, Еўропа вельмі позна заўважыла пагрозу, якую Расея нясе Украіне, таму мы не мусім цяпер марудзіць з дапамогай Украіне. Гэтая вайна скончыцца, калі кожны дом, кожная школа, кожная больніца і кожная дарога будуць вернутыя», – сказаў Маравецкі.
Сёння ж у Кіеў прыехаў прэмʼер-міністр Бельгіі Аляксандэр дэ Кро. Ён праводзіць перамовы з прэзідэнтам Уладзімірам Зяленскім.
Перад сустрэчай прэмʼер напісаў у Twitter, што напярэдадні зімы Бельгія вылучае Украіне новую гуманітарную і вайсковую дапамогу.
Сяргей Крот belsat.eu