Расея знайшла спосаб падтрымаць беларускія НПЗ ва ўмовах заходніх санкцыяў і страты ўкраінскага рынку. Расейскі бюджэт будзе субсідаваць пастаўкі беларускага паліва ў РФ, якія раней былі стратнымі, за кошт дэмпферных выплатаў. Пра гэта паведамляе «КоммерсантЪ» са спасылкай на ўласныя крыніцы.
Расейскі «Промсырьеимпорт», са словаў крыніцаў «Коммерсанта», ужо пачаў рэалізоўваць набытае па высокіх коштах беларускае дызпаліва на біржы СПбМТСБ, страты яму кампенсуюць з бюджэту. Дадатковыя пастаўкі марозаўстойлівага дызпаліва патрэбныя РФ ва ўмовах магчымага дэфіцыту, але пакуль імпарт з Беларусі невялікі.
Сутнасць дэмпфернага механізму, які выкарыстоўваецца для расейскіх НПЗ, у тым, што яны атрымліваюць 65 % ад розніцы паміж экспартнай цаной і фіксаванай унутранай цаной паліва.
Пастаўкі міжсезоннага паліва з беларускіх НПЗ у Расею аднавіліся 10 кастрычніка, а да гэтага былі зведзеныя да мінімуму з прычыны стратнасці. Цяпер іх абʼёмы таксама даволі сціплыя: каля 8,5 тысячаў тон на 24 кастрычніка, што складае прыкладна 3 % ад агульнага абʼёму паставак дызпаліва за гэтыя дні. Але ў выпадку магчымага дэфіцыту марозаўстойлівых гатункаў дадатковыя пастаўкі дазволяць пазбегчы росту коштаў на іх.
Для беларускіх прадпрыемстваў гэтыя закупы кампенсуюць страчаныя ўкраінскія рынкі аўтамабільнага паліва: раней яны забяспечвалі 45 % імпарту бензіну і 37 % імпарту дызпаліва ва Украіну.
«Промсырьеимпорт» застаецца пад санкцыямі ЗША за пастаўкі іранскай нафты ў Сірыю. Ён таксама выступае аптовым пастаўляльнікам паліва і газу ў Крым. У верасні «Промсырьеимпорту», на распараджэнне ўраду Расеі, надалі права рэалізацыі ў РФ бензіну і дызпаліва, зробленых «замежнай арганізацыяй», а таксама права прэтэндаваць на атрыманне дэмпфера. Пад крытэрыі «замежнай арганізацыі» падпадае беларускі «Белнафтахім», якому належаць Наваполацкі і Мазырскі НПЗ.
Антон Тачняк belsat.eu