Расейскі радыёвядоўца Венядзіктаў папрасіў падкінуць пытанняў да інтэрв’ю з Ціханоўскай

У бліжэйшы час Святлана Ціханоўская можа даць інтэрв’ю галоўнаму рэдактару радыёстанцыі «Эхо Москвы» Аляксею Венедыктаву.

Аляксей Венядзіктаў на Пецярбургскім эканамічным форуме. 2017 год. Фота: open.gov.ru

Пра гэта сам Аляксей Венядзіктаў паведаміў вечарам 25 кастрычніка на Facebook – і папрасіў «падкінуць пытанняў» з улікам таго, што інтэрв’ю разлічваюць перадусім на расейскую аўдыторыю.

«Эхо Москвы» – адно з нешматлікіх расейскіх медыяў, якое адносна вольна дзейнічае, даючы голас расейскай апазіцыі (хоць дзве траціны акцыяў належаць «Газпром-медиа холдингу»), і пры тым Венядзіктаў цесна кантактуе з Крамлём і ў прыватнасці сябруе з прэс-сакратаром Уладзіміра Пуціна. Венядзіктаў бараніў вынікі спрэчнага онлайн-галасавання на нядаўніх парламенцкіх і мясцовых выбарах у Расеі, за што яго крытыкавала апазіцыя.

Магчымае інтэрв’ю Ціханоўскай Венядзіктаву абмяркоўвалі ў кантэксце публікацыі вынікаў апытання расейскага ВЦИОМ аб стаўленні беларусаў да прадстаўнікоў улады і апазіцыі, а таксама іншых беларуска-расейскіх скандалаў, як то да зняволення журналіста «Комсомольской правды в Беларуси», «наездаў» расейскага тэлеканалу НТВ на Аляксандра Лукашэнку ці намёкаў вядоўцы СТВ на кагосьці, хто «хаваецца ў бункеры» і «карыстаецца ботаксам» (за якія давялося апраўдвацца, што гэта было не пра Пуціна).

Што запытвалі расейскія сацыёлагі ў беларусаў? Падсумоўваем галоўныя падзеі тыдня

АА belsat.eu

Падпісвайся на telegram Белсату

Hавiны