У Нацыянальным санктуарыі Маці Божай Будслаўскай, дзе пасля пажару быў знішчаны дах і залітае вадой памяшканне касцёлу, аднавілі 70% даху, паведамляе тэлеграм-канал «Адновім Будслаў разам!».
Агульная сума ахвяраванняў на рамонт святыні склала 1 045 000 рублёў, піша «Народная воля» са спасылкай на пробашча будслаўскай парафіі Дзмітрыя Дубовіка. Аднак паводле ксяндза, на аднаўленне касцёлу патрэбна яшчэ 300 тысяч рублёў.
Цяпер у касцёле інтэнсіўна ідуць працы на накрыцці даху – працаўнікі мусяць паспець да наступлення халадоў. Працы вядуцца таксама ўнутры касцёлу.
Касцёл у Будславе загарэўся раніцай 11 траўня. Пажар удалося патушыць, а таксама ўратаваць галоўны скарб святыні – абраз Маці Божай Будслаўскай. Аднак у касцёле цалкам выгарэў і абваліўся дах.
Таксама 2 кастрычніка запрашаюцца валанцёры для працы па навядзенні парадку ў касцёле і вакол яго. Збор у 10:00. Святая Імша ў 9:00.
АД, belsat.eu
