Кіраўніца «Русі сядзячай» заклікала пісаць лісты Каці Андрэевай і Дар’і Чульцовай
Расейская журналістка, кіраўніца ініцыятывы «Русь сядзячая» Вольга Раманава заклікала ў сваім Facebook пісаць лісты зняволеным журналісткам «Белсату» Кацярыне Андрэевай і Дар’і Чульцовай.
«Турэмшчыкі распавядаюць ім, што пра іх усё забыліся і яны нікому не патрэбныя. Пры гэтым настойліва прапануюць ім напісаць прашэнне аб памілаванні на імя Лукашэнкі. Дзяўчыны трымаюцца. Але давайце дапаможам ім. Напішыце, калі ласка, ліст або паштоўку ў калонію», – напісала журналістка.
Вольга Раманава таксама адзначыла, што вельмі важна не проста напісаць ліст, але і па магчымасці апублікаваць, напрыклад, у сацсетках, што ліст дасланы.
«Бо сам ліст цэнзура яшчэ можа завярнуць, тут гарантый няма, а пра факт яго адпраўкі заўсёды можна будзе паведаміць праз адваката, то бок Каця і Даша ў любым выпадку даведаюцца аб вашай падтрымцы і салідарнасці», – заявіла Вольга Раманава.
Адрас для лістоў такі:
246035, Рэспубліка Беларусь, г. Гомель, вуліца Антошкіна 3, Папраўчая калонія №4.
Бахвалава Кацярына Андрэеўна і Чульцова Дар’я Дзмітрыеўна
МГ belsat.eu
