З раніцы 26 ліпеня ў былой Верабейскай школе Алітускага раёну Літвы пачаўся бунт мігрантаў. Яны адмовіліся выконваць законныя патрабаванні супрацоўнікаў Службы грамадскай бяспекі, паведамляе Delfi.
Канфлікт узнік пасля таго, як іракцы забаранілі іншым мігрантам браць дастаўленую ежу.
«Усё пачалося раніцай, калі не дазволілі раздаваць мігрантам прывезеную ежу. Ежу не дазволілі браць нават дзецям і падлеткам, а таксама жанчынам. Цяпер прывезлі абед, і яго не даюць раздаваць», – распавёў намеснік дырэктара адміністрацыі Алітускага муніцыпалітэта Віргіліюс Пранскявічус.
Па словах мэра Алітускага раёну Альгірдаса Урубляўскаса, незадаволенасць сярод мігрантаў пачала выяўляцца яшчэ ў мінулую пятніцу – пасля таго як туды прыехалі журналісты. Пабачыўшы камеры мігранты сталі патрабаваць лекара і каб ім вярнулі тэлефоны.
У выходныя мігранты трохі супакоіліся, бо ім абяцалі, што іх патрабаванні разгледзяць адказныя асобы.
«Але ад сённяшняй раніцы і гаворкі няма аб перамовах. Яны выкінулі ежу. Самі іракцы есці адмаўляюцца, яны забаранілі і іншым браць ежу. Адзінае патрабаванне – выпусціць іх з тэрыторыі, – сказаў мэр. – Там усюды смецце, у туалетах экскрэменты льюцца праз край, мігранты не пускаюць работнікаў чыніць каналізацыю. Цяпер мы і самі баімся пасылаць туды работнікаў, гэта небяспечна».
Зараз у Верабеяй дзяжураць 16 супрацоўнікаў Службы грамадскай бяспекі Літвы. Яны працуюць у жудасных умовах: дзяжураць 8 гадзін, потым там жа адпачываюць у спальных мяшках ля плота. Потым – зноў дзяжурства. Таксама ў іх няма нармальных умоў для падтрымання гігіены.
АД, belsat.eu
