У лісце, які датаваны 20 ліпеня, Рыгор Кастусёў адзначае, што кіраўнік следчай групы, які вядзе крымінальную справу, ужо ў трэці раз адмовіў у пераводзе абвінавачанага палітыка пад хатні арышт.
Адпаведныя хадайніцтвы адваката таксама былі адхіленыя, нягледзячы на праблемы са здароўем.
Цяпер Рыгор Кастусёў знаходзіцца пад вартай у СІЗА КДБ у Менску.
Пры гэтым аніякіх следчых дзеянняў з удзелам Рыгора Кастусёва пад вартай ужо даўно не робіцца. Расследаванне крымінальнай справы па «змове з мэтай захопу дзяржаўнай улады» працягнутае да кастрычніка.
Нагадаем, што з пачатку ліпеня з-за пагаршэння стану здароўя Рыгор Кастусёў быў пераведзены ў медычны корпус СІЗА МУС на Валадарскага. Па яго словах, умовы ў медычным корпусе дазволілі яму крыху ачуняць ад вельмі суровага рэжыму ўтрымання ў СІЗА КДБ.
Аднак у сярэдзіне ліпеня дачка Рыгора Кастусёва Кацярына распавяла, што аналізы паказваюць на падазрэнне ў бацькі анкалагічных захворванняў.
Тым не менш, у змяненні меры стрымання палітыку было адмоўлена.
Таксама Рыгор Кастусёў у лісце наракае на інфармацыйную ізаляцыю: некаторыя лісты паплечнікаў па партыі так і не даходзяць па незразумелых прычынах. Дазвол на размяшчэнне ў камеры тэлепрыёмніка Рыгору Кастусёву адміністрацыя СІЗА па-ранейшаму не дае: «Інфармацыйны вакуум: ні тэлевізара, ні газет» – піша Рыгор Кастусёў у лісце ад 20 ліпеня.
АД, belsat.eu