Міністэрства абароны Беларусі паведаміла пра загаранне БМП на палігоне «Лепельскі». Ёсць пацярпелыя.
Паводле Мінабароны, падчас заняткаў кіравання баявых машын вайсковец тэрміновай службы далажыў кіраўніку аб загаранні. Кіроўца заглушыў рухавік і самастойна пакінуў БМП. Вайсковец атрымаў апёкі. Ён застаецца ў свядомасці.
Яго плануецца шпіталізаваць у Галоўны вайсковы клінічны медычны цэнтр у Менску.
Загаранне зліквідавалі, яго прычына высвятляецца.
Нагадаем, 19 траўня ў Баранавічах разбіўся вучэбна-баявы Як-130 Лідскай штурмавой авіябазы. Пры выкананні вучэбна-трэнавальнага палёту экіпаж выявіў тэхнічную няспраўнасць. Лётчыкі загінулі.
А 27 чэрвеня ў Лунінецкім раёне жорстка сеў верталёт Мі-2 Міністэрства надзвычайных сітуацыяў Беларусі. Камандзіра шпіталізавалі, а тэхніка аднаўленню не падлягае.
МГ belsat.eu