У мястэчку Бярозаўка 26 траўня развіталіся з 50-гадовым палітвязнем Вітольдам Ашуркам, які загінуў пры нявызначаных абставінах у Шклоўскай калоніі.
Развітацца з Вітольдам людзі пачалі ісці яшчэ ўчора, калі труну з целам прывезлі ў Бярозаўку. Таксама, каб праводзіць у апошні шлях Ашурка, людзі прыязджаюць з розных гарадоў Беларусі.
Наш карэспандэнт на месцы распавядае, што развітацца з Вітольдам прыйшлі шмат ягоных паплечнікаў з Лідчыны. Таксама нямала людзей прыехала і з Менску.
Пасля развітання ў будынку Дому быту, а 14-й у бярозаўскім касцёле прайшла імша. Пасля яе Вітольда Ашурка пахавалі на гарадскіх могілках.
Шмат хто з жыхароў Бярозаўкі, якія назіраюць за працэсіяй, з жахам і шкадаваннем кажуць пра тыя пашкоджанні, якія відаць на целе Вітольда.
Працэсія прайшла ўздоўж шклозаводу «Нёман», на якім шмат гадоў адпрацаваў Вітольд. Некаторыя працаўнікі выйшлі да прахадной, каб развітацца з калегам.
Калі труну заносілі ў касцёл, людзі паказвалі знак «Віктары».
Тыя, хто прыходзіць развітацца з Вітольдам, пакідаюць паперкі з ягонымі словамі:
«Ці могуць незнаёмыя людзі быць сябрамі? Могуць! Калі яны беларусы!»
Сяброўка сям’і Вольга Быкоўская, якая прысутнічала на пахаванні Ашурка, кажа, што цяпер Бярозаўка поўная міліцыі, а на пад’ездзе да мястэчка поўныя легкавушкі і бусы спыняе ДАІ дзеля праверкі дакументаў.
Таксама на развітанні прысутнічалі прадстаўнікі дыпламатычных місіяў Еўразвязу і ЗША.
Пахавалі Вітольда Ашурка пад бел-чырвона-белым сцягам. Яго брат прыгадаў, што ён калісьці пра гэта марыў.
Палітвязень Вітольд Ашурак памёр у калоніі 21 траўня. Сваякам сказалі, што ў яго спынілася сэрца, але Вітольдава ўдава кажа, што ейны муж ніколі не меў праблемаў з сэрцам.
Прычыны смерці Вітольда да канца не зразумелыя. У пасведчанні аб ягонай смерці напісана, што непасрэдная прычына смерці высвятляецца. Таксама ў Вітольда перавязаная галава, а рукі падрапаныя.
Між тым, родныя змаглі атрымаць цела памерлага Вітольда Ашурка толькі праз некалькі дзён пасля ягонай смерці.
АД, belsat.eu