Яшчэ днём прастора была адкрытая, аднак адзін самалёт кружляў каля польскай мяжы, бо яго маршрут не ўхваліла Францыя.
Рада міністраў Польшчы вечарам 26 траўня прыняла забарону на выкарыстанне паветранай прасторы для авіяперавознікаў з Беларусі, паведаміў афіцыйны прадстаўнік польскага ўраду Пётр Мюлер.
«Гэта элемент рэалізацыі санкцыяў, пра якія прасіў падчас Еўрапейскай Рады прэм’ер Маравецкі», – растлумачыў Мюлер.
Ці забарона бестэрміновая, не паведамляецца.
Рашэнне Саміту Еўразвязу аб забароне беларускім авіякампаніям палётаў у Еўразвяз не ўхваленае канчаткова – яго яшчэ маюць зацвердзіць міністры краінаў альянсу. Міжнародная арганізацыя грамадзянскай авіяцыі склікае 27 траўня тэрміновае паседжанне праз сітуацыю ў Беларусі.
Аднак раней прымаць беларускія рэйсы самастойна адмовіліся Вялікая Брытанія і Францыя, а Ўкраіна спыніла ўсе авіяцыйныя зносіны з Беларуссю. За сёння паветраную прастору для Беларусі закрылі Латвія, Літва, Чэхія, Фінляндыя, Швецыя. Беларусь аблятаюць і самалёты многіх авіякампаніяў, улады якіх не абвяшчалі забаронаў адносна Беларусі.
23 траўня самалёт «Ryanair», які ляцеў з Афінаў у Вільню, зрабіў вымушаную пасадку ў Менску праз інфармацыю аб «мініраванні», якую экіпаж атрымаў ад беларускіх дыспетчараў. У Менску затрымалі прынамсі двух пасажыраў: блогера Рамана Пратасевіча і ягоную сяброўку Сафію Сапегу. Астатніх пасажыраў адпусцілі пад вечар. Гендырэктар «Ryanair» назваў перанакіраванне самалёта ў Менск «дзяржаўным пірацтвам», прэм’ер-міністр Польшчы – «дзяржаўным тэрарызмам». Нямеччына асудзіла ў тым ліку відэа з «прызнаннем палоннага» Пратасевіча.
АА belsat.eu
