Bloomberg: Еўразвяз задумаў санкцыі супраць хімічнай прамысловасці Беларусі

Амерыканскае фінансавае выданне «Bloomberg» са спасылкай на ананімнага прадстаўніка Еўразвязу расказала 26 траўня пра планы на новы пакет еўрапейскіх санкцыяў – цяпер у адказ на захоп Беларуссю самалёта «Ryanair» і арышт журналіста Рамана Пратасевіча.

Афіцыйных пацверджанняў ці абвяржэнняў інфармацыі выдання пакуль не было. Прадстаўнік «Беларуськалію» ў лісце выданню назваў інфармацыю «занадта спекулятыўнай».

Будынкі «Беларуськалію» ў Салігорску. Фота: Vasily Fedosenko / Reuters / Forum

Паводле Bloomberg, «больш жорсткія захады могуць быць накіраваныя на калійную вытворчасць». Калій з’яўляецца галоўным экспартным таварам Беларусі, які забяспечвае вялікую долю еўрапейскага попыту, і адзінай мінеральнай сыравінай, на якую багатая Беларусь, піша выданне. «Беларуськалій» – адна з найвялікшых дзяржаўных кампаніяў Беларусі. Санкцыі таксама могуць закрануць авіякампанію «Белавія».

Акрамя таго, наступныя санкцыі маюць уключаць людзей, звязаных з захопам самалёта «Ryanair», піша Bloomberg. Чакаецца, што гэтыя санкцыі прымуць 21 чэрвеня.

Мэркель заявіла, што ЕЗ плануе пашырыць эканамічныя санкцыі супраць рэжыму Лукашэнкі

«Апошнім часам наладжванне адзінагалосся паміж урадамі Еўразвязу аказалася складаным, і некалькі краінаў імкнуліся пазбегнуць шкоды для сваёй эканомікі і не выклікаць утварэнне супярэчлівых палітычных альянсаў», – піша «Bloomberg» і адзначае, што праз гэта прапановы аб санкцыях павінны быць вельмі дакладнымі і адназначнымі.

Санкцыі супраць беларускага калію могуць узняць цэны на калійныя ўгнаенні ў Еўропе, бо Беларусь забяспечвае каля 25% еўрапейскага попыту на іх. Але беларускую прадукцыю можа даволі хутка замяніць расейская, кажа аналітык.

Польшча, Латвія, Літва, Фінляндыя, Чэхія і Швецыя закрылі сваё неба для Беларусі. Хто яшчэ

АА belsat.eu

 

Hавiны