25 сакавіка ў менскім Катэдральным касцёле будуць маліцца за Беларусь


«Вельмі сімвалічна, што акт незалежнасці Беларускай Народнай Рэспублікі, калі было абвешчана аб заснаванні новай дзяржавы, быў падпісаны менавіта ў свята Звеставання Пана – 25 сакавіка», – адзначае арцыбіскуп Тадэвуш Кандрусевіч.

Беларускі арнамент на кашулі каталіцкага святара падчас фэсту ў Будславе ў 2015 годзе. Фота catholic.by

У Менску ды Магілёве

А 10:00 у менскім архікатэдральным касцёле Імя Найсвяцейшай Панны Марыі 25 сакавіка адбудзецца святая Імша, якую ўзначаліць Мітрапаліт Менска-Магілёўскі арцыбіскуп Тадэвуш Кандрусевіч, гаворыцца ў паведамленні афіцыйнага парталу catholic.by.

Назірайце за святам незалежнасці онлайн. У нядзелю, 25 сакавіка, а 12:00 мы пачнем наўпроставую трансляцыю святочнага канцэрту ў Менску, акцыяў у іншых гарадах Беларусі, пакажам размовы з удзельнікамі ды гісторыкамі. Запрашаем! Святкуйма Дзень Волі разам!

25 сакавіка католікі звычайна святкуюць свята Звеставання Пана ў памяць таго, як архангел Габрыель абвясціў Марыі аб тым, што Бог выбраў Яе ў якасці Маці Збаўцы. Згода Марыі на гэта – «няхай так станецца» – змяніла гісторыю сусвету, кажа іерарх.

«Свята 100-годдзя абвяшчэння Беларускай Народнай Рэспублікі – гэта свята беларускага Звеставання незалежнасці», – сказаў мітрапаліт.

Арцыбіскуп мітрапаліт Тадэвуш Кандрусевіч. Фота catholic.by

«Хоць далейшы лёс БНР не прывёў да чаканага выніку, тым не менш «сам факт яе абвяшчэння 25 сакавіка вельмі красамоўны, бо сведчыць пра жаданне беларускага народа да незалежнасці», – дадаў каталіцкі іерарх.

Таксама ў магілёўскай катэдры аб 11:00 св. Імшу будзе святкаваць дапаможны біскуп Аляксандр Яшэўскі.

Сёлета на 25 сакавіка ў Каталіцкім Касцёле прыпадае Пальмавая нядзеля, таму свята Звеставання перанесена на 9 красавіка. Пакуль няма інфармацыі пра тое, якія касцельныя мерапрыемствы ў памяць 25 сакавіка 1918 году будуць адбывацца ў іншых сталіцах беларускіх каталіцкіх дыяцэзіяў – Горадні, Пінску і Віцебску.

Малітва за Беларусь

Ксёндз Юрый Санько, які выконвае абавязкі прэс-сакратара Канферэнцыі Каталіцкіх Біскупаў у Беларусі, адзначыў, што абвяшчэнне незалежнасці БНР, безумоўна, важная падзея ў гісторыі сучаснай Беларусі.

Каталіцкая працэсія ў Менску, 2015 год

«Утварэнне Беларускай Народнай Рэспублікі – першы крок да сённяшняй незалежнасці. Касцёл не можа застацца ў баку… Касцёл сваёй малітваю, сваёй прысутнасцю асвячае нашу зямлю, таму біскупамі было прынята рашэнне аб стварэнні адмысловай малітвы, якой святары ў гэты дзень будуць прасіць Бога за нашу Бацькаўшчыну, наш народ, каб добры Бог дабраслаўляў і напаўняў нашую штодзённасць сваёй прысутнасцю», – сказаў афіцыйны прадстаўнік Касцёла ў Беларусі Ватыканскаму радыё.

Канчаткова яшчэ не вырашана, як будзе выглядаць малітва – як адзін з заклікаў Малітвы вернікаў, або асобная малітва, што прачытаюць на завяршэнне эўхарыстыі. У некаторых парафіях будзе святкавацца асобная св. Імша за Беларусь, распавёў ксёндз Юрый Санько.

Ксёндз Гадлеўскі падчас казання ў касцёле ў Жодзішках, 1924 г. Фота catholic.by

Практычна ўсе, хто будаваў беларускую незалежную дзяржаўнасць у ХХ стагоддзі, былі хрысціянамі. Шмат хто з іх былі католікамі, у тым ліку каталіцкімі святарамі. Гэтак адным з першых па-беларуску пачаў служыць у 20 стагоддзі ксёндз Вінцэнт Гадлеўскі. Ён удзельнічаў у нацыянальнай грамадскай дзейнасці, а пасля абвяшчэння Беларускай Народнай Рэспублікі ўвайшоў у склад яе Рады.

Святара ў часе польскай акупацыі Заходняй Беларусі неаднаразова пераследавалі, выслалі на тэрыторыю этнічнай Польшчы, а падчас нямецкай акупацыі ён крытыкаваў нацысцкія парадкі і быў забіты нацыстамі ў Трасцянцы пад Менскам.

У суседняй Літве ў гонар 100-годдзя дзяржаўнасці мясцовым католікам біскупы дазволілі ў гэтым годзе не пасціцца ў першую пятніцу Вялікага посту.

Аляксандр Гелагаеў belsat.eu

Глядзі таксама
Каментары