Абраная прэзідэнтка Святлана Ціханоўская зладзіла афіцыйны візіт у Канаду. Офіс падводзіць вынікі гэтай паездкі.
Падчас візіту ў Канаду Святлана Ціханоўская сустрэлася з прэм’ерам Жустэнам Трудо, а таксама кіраўнікамі Міністэрства замежных справаў, Міністэрства абароны, спікерам Сенату, выступіла перад дэпутатамі, экспертнай супольнасцю, студэнтамі.
Акрамя гэтага Святлана Ціханоўская мела сустрэчу з Івонкай Сурвілай, старшынёй Рады БНР, і выступіла ў дыскусіі на Міжнародным форуме ў Гэліфаксе.
Па выніках візіту Канада ўвяла санкцыі супраць 22 чыноўнікаў і 16 кампаніяў з Беларусі за падтрыманне вайны супраць Украіны. Сярод тых, хто трапіў пад санкцыі, – «Белтэлерадыёкампанія», «Белнафтахім», «557-ы авіярамонтны завод», «Сінэзіс», «Брэміна», Прэзідэнцкі спартовы клуб, а таксама Азаронак, Гладкая, Баскін, Галоўчанка, Вальфовіч, Алексін, Кубракоў і сам Лукашэнка.
Канада будзе ўздымаць пытанне Беларусі ў G7, АБСЕ і ААН, каб не дапусціць паглынання Беларусі Расеяй, а таксама паспрабуе прыцягнуць Лукашэнку да адказнасці за тэрор у Беларусі і ваенныя злачынствы супраць Украіны.
На сустрэчы з Івонкай Сурвілай абмеркавалі неабходнасць падтрымліваць беларускую дыяспару – як у Канадзе, так і па ўсім свеце, а таксама важнасць супольных захадаў дзеля абароны беларускай незалежнасці.
Ціханоўская прапанавала Канадзе разгледзець магчымасць запуску і падтрымання рэабілітацыйнай праграмы для дзетак палітвязняў паводле прынцыпу чарнобыльскіх праграмаў і стажыровак ды стыпендыяў для беларусаў. Ціханоўская папрасіла Канаду забяспечыць беларускіх добраахвотнікаў ва Украіне неабходнымі зімовымі рэчамі і абсталяваннем.
Ціханоўская заклікала прызнаць рэжым Лукашэнкі спонсарам тэрарызму, а КДБ і ГУБАЗіК тэрарыстычнымі арганізацыямі, і таксама арганізаваць слуханні аб Беларусі ў абедзвюх палатах парламенту.
Алена Аляксандрава belsat.eu
