«Справа дэфектная». Начальнік віцебскай «хіміі» не можа вылічыць, калі трэба вызваляць Ігара Банцэра
У рэдакцыю «Белсату» трапіў дакумент, які начальнік папраўчай установы адкрытага тыпу № 9 у Віцебску, дзе адбывае тэрмін палітычны вязень і музыка Ігар Банцэр, накіраваў у суд. У паперы ён называе «справу Банцэра» дэфектнай і не можа дакладна вызначыць даты вызвалення.
«Справа дэфектная, у сувязі з чым заканчэнне тэрміну адбывання вызначыць не ўяўляецца магчымым», – адзначае начальнік віцебскай «хіміі» ў заяве ў суд.
Паводле дакументу, Ігар Банцэр пачаў адбываць тэрмін 17 чэрвеня 2021 года. У адбыты залічваецца тэрмін затрымання – 20–21 кастрычніка 2020 года, а таксама тэрмін утрымання пад вартаю – з 22 кастрычніка да 19 сакавіка сёлета.
Ігару Банцэру засталося сядзець менш за месяц. Аднак ціск на яго не спыняецца. Са жніўня за ўвесь час «хіміі» актывіст правёў у штрафным ізалятары 60 содняў. На знак пратэсту ён неаднаразова абвяшчаў галадоўкі. За нібыта парушэнні рэжыму віцебскі суд прызначыў яму больш жорсткае пакаранне і хацеў адправіць у калонію. Але гэты прысуд быў адменены.
Сёння стала вядома, што Ігара Банцэра зноў кінулі ў ШІЗА на 10 содняў – нібыта за відэа з «хіміі», выкладзенае ў сеціва, якое палітвязень сам паказаў міліцыянтам.
19 сакавіка 2021 года музыку асудзілі на паўтара года «хіміі» за вулічны перформанс – танец без штаноў перад міліцэйскім аўтамабілем пасля прэзідэнцкіх выбараў. Беларускія праваабаронцы прызналі Банцэра палітычным вязнем.
ЗК belsat.eu
