Праваабаронцы паведамляюць, што ў Гомлі сілавікі затрымалі мінімум 8 чалавек. Іншадумцаў прымушаюць запісваць «пакаянныя відэа».
Сёння ранкам у Гомлі міліцыя правяла ператрус на кватэры Алега Бондарава. Сілавікі прыйшлі а 6-й раніцы. А 10-й гадзіне пасадзілі ў аўта і павезлі з сабой. Шукалі сцягі. Вядома, што Алег быў назіральнікам на выбарах-2020, паведамляюць гомельскія валанцёры.
Адбыўся ператрус і ў кватэры 20-гадовага Аляксея Валатоўскага, дзе ён жыве з маці і братам-школьнікам. У пастанове пазначана, што ператрус адбываецца ў межах расследавання крымінальнай справы паводле артыкулу «экстрэмізм». Супрацоўнікі ГУБАЗіК сканфіскавалі ноўтбук і тэлефон Аляксея. Яго адвезлі ў РАУС.
Таксама раніцай затрымалі яшчэ аднага жыхара Гомля – Артура Караткевіча.
У Гомлі затрыманыя Аляксандр Цыганкоў, Андрэй Самусеў, Аляксандр Сівакоў, Вераніка Кухарава, Ганна Міхно. Іх прымусілі запісаць «пакаянныя відэа», якія зʼявіліся ў Telegram-канале ГУБАЗіКу.
«Такім чынам, ГУБАЗ абʼяўляе пакаянны панядзелак! Змагары сёння зробяць паломніцтва да верных праваахоўнікаў з мэтай выпраўлення свайго шалапутнага жыцця», – пішуць у канале ГУБАЗіКу.
Іншадумцаў прымушаюць прасіць прабачэння за падпіску на пратэставыя тэлеграм-каналы. Хаця падпіска і чытанне рэсурсаў, якія ўлады прызналі «экстрэмісцкімі», нават паводле дзейнага заканадаўства не ёсць ні правапарушэннем, ні злачынствам.
Адна з затрыманых на відэа плача і кажа, што цяпер за падпіску на пратэставыя тэлеграм-каналы яна панясе пакаранне. Іншаму затрыманаму байцы ГУБАЗіКу здзекліва наляпілі на адзенне бел-чырвона-белыя налепкі.
ІІ belsat.eu