Марыя Калеснікава 25 жніўня дала паказанні на судовым працэсе. Пра гэта паведамляюць Naviny.by.
«Марыя, як і Максім Знак, таксама паслядоўна абвергнула абвінавачанні і працягвае на гэтым настойваць», – распавёў адвакат Уладзімір Пыльчанка.
Паводле яго, Марыя «бадзёрая і адчувае сябе добра».
Напярэдадні Максім Знак, кажа адвакат, «зрабіў дэтальныя паказанні, якія аспрэчваюць усе інкрымінаваныя яму дзеі» і каментаваў следчыя матэрыялы справы, «у якіх, як абарона паказвала раней, няма ніякіх доказаў ягонай віны».
Суд над сябрамі прэзідыуму Каардынацыйнай рады і прадстаўнікамі каманды Віктара Бабарыкі пачаўся 4 жніўня. Працэс зрабілі закрытым.
Паводле абвінавачання, Знак і Калеснікава «супольна з іншымі асобамі не пазней за 16 ліпеня 2020 года ўступілі ў таемную змову з мэтаю захопу дзяржаўнай улады неканстытуцыйным шляхам». Ім пагражае да 12 гадоў турмы.
МГ belsat.eu