Урад дзейснага прэзідэнта Нікарагуа Даніэля Артэгі затрымаў ужо сёмага патэнцыйнага кандыдата на пасаду прэзідэнта – Ноэля Хосэ Відорэ, паведамляе ВВС. Палітыка абвінавацілі ў спробе «падрыву суверэнітэту» краіны і здрадзе дзяржаве і змясцілі пад хатні арышт.
Ноэль Відорэ планаваў выступіць кандыдатам ад групы Alianza Ciudadanos por la Libertad, якая выступае супраць Артэгі. 66-гадовага палітыка затрымалі ва ўласным доме ў сувязі са «здзяйсненнем дзеянняў, якія ставяць пад пагрозу незалежнасць, суверэнітэт, самавызначэнне Нікарагуа, а таксама падбухторваннем да замежнага ўмяшальніцтва ва ўнутраныя справы, зваротам па вайсковую інтэрвенцыю, атрыманнем фінансавання ад замежных дзяржаваў для правядзення тэрарыстычных актаў і дэстабілізацыі сітуацыі».
Прэзідэнцкія выбары ў Нікарагуа адбудуцца 7 лістапада.
75-гадовы Даніэль Артэга сёлета будзе балатавацца чацвёрты раз запар. Ён кіруе краінай з 2007 года, быў прэзідэнтам і ў 1985-1990 гадах.
Рэпрэсіі супраць патэнцыйных кандыдатаў у прэзідэнты пачаліся ў Нікарагуа 2 чэрвеня. Супернікаў дзейснага прэзідэнта абвінавацілі ў пагрозе суверэнітэту краіны. Апазіцыйныя палітыкі сутыкнуліся з ператрусамі і начнымі арыштамі.
Сярод затрыманых – дачка экс-прэзідэнта краіны Крысціяна Чаморра, якая, згодна з вынікамі апытанняў, лічыцца фаварытам перадвыбарчай гонкі, палітычны аглядальнік Хаймэ Арэльяна.
Летась у снежні ў Нікарагуа быў прыняты закон, які забараняе «тым, хто просіць і вітае ўкараненне санкцыяў супраць Нікарагуа» прэтэндаваць на дзяржаўныя пасады. Цяпер гэты закон выкарыстоўваецца для апраўдання затрыманняў прадстаўнікоў апазіцыі.
Кандыдаты ў прэзідэнты ў Нікарагуа мусяць зарэгістравацца ў перыяд з 28 ліпеня па 2 жніўня, але закон забараняе рэгістрацыю тым, хто знаходзіцца пад судовым пераследам.
ГГ, belsat.eu