Святлана Ціханоўская сустрэлася з беларускай дыяспарай у аўтакефальнай царкве ў Нью-Йорку
Падчас сустрэчы беларуская лідарка выступіла перад прысутнымі па-беларуску. Прадстаўнікі дыяспары перадалі Ціханоўскай залаты знак Рады БНР ад Івонкі Сурвілы.
У нядзелю 25 ліпеня Святлана Ціханоўская сустрэлася з прыхаджанамі аўтакефальнай беларускай царквы ў Брукліне, Нью-Йорк. Лідарку беларускай апазіцыі царкоўны хор прывітаў спевам «Дай Божа, шмат год». Кіраўніца хору – беларуска, якая жыве ў ЗША яшчэ з часоў паваеннай эміграцыі – распавяла Святлане, што будынак царквы некалі быў набыты сіламі мясцовых беларусаў, а таксама, што храм адчынены для прадстаўнікоў усіх канфесіяў.
Ціханоўская звярнулася да прысутных на беларускай мове:
«Нас аб’яднала бяда, і нас аб’яднала адна барацьба. Летась беларусы прачнуліся. Мала хто мог уявіць сотні тысячаў беларусаў на вуліцах і плошчах пад нашымі бел-чырвона-белымі сцягамі. Беларусы для ўсяго свету сталі прыкладам настойлівасці, міралюбства і вольналюбства. І цяпер для мяне кожны, хто змагаецца за свабоду нашай радзімы, гэта брат і сястра. У нас ужо ніколі не адабраць пачуцця годнасці. Мы з вамі – адна сям’я. Нажаль, у гэтай сям’і многія раскіданыя па свеце. Я хачу, каб мы былі той самай дружнай сям’ёй, дзе людзі збіраюцца разам, каб пераадолець пакуты. Узгадаем тых, хто не дачакаўся гэтай велічнай хвіліны: Канстанціна, Мікіту, Генадзя, Аляксандра, Рамана, Вітольда і Дзіму. Мы падзякуем ім і ўсім, хто змагаўся да апошняга за нашу свабоду і веру да канца ў нашую перамогу. І разам, агульнымі сіламі мы будзем будаваць новую Беларусь. Жыве наша вялікая і моцная беларуская сям’я. Жыве Беларусь».
Прадстаўнікі дыяспары перадалі Ціханоўскай залаты знак Рады БНР ад Івонкі Сурвілы, падаравалі копію крыжа Еўфрасінні Полацкай, ікону царквы, кветкі ад дыяспары Фларыды, куды пакуль няма візіту. Святлана ў сваю чаргу падаравала кнігу «Я выходжу» пра беларускі пратэст. Напрыканцы заспявалі гімн «Магутны Божа».
ГГ, belsat.eu
