Прадстаўніца «Слодыча» пісала, што беларускамоўны зварот дыскрымінуе расейскамоўных.
Заснавальнікі ініцыятывы «Ўмовы для мовы» Ігар Случак і Аліна Нагорная звярнуліся да кандытарскай фабрыкі «Слодыч» з просьбай дадаць беларускую мову на пакункі прадукцыі. Адказ, як піша «Радыё Свабода», быў такі:
«…Обращением только на белорусском языке вы избавили возможности русскоговорящих сотрудников ОАО, ответственных за делопроизводство, получить информацию о сути просьбы на том языке, который они используют в повседневной жизни. Таким образом, русскоговорящая категория сотрудников — а это практически 100% — дискриминируется вами по языковому признаку, что нарушает ст. 17 Конституции Республики Беларусь».
Случак і Нагорная абскардзілі гэткі адказ за подпісам галоўнага тэхнолага Марыі Ярошкінай у пракуратуры і адміністрацыі Партызанскага раёну Менску.
Пракуратура абавязала кіраўніцтва «Слодыча» даць адказ па-беларуску і прыцягнуць супрацоўніка да дысцыплінарнай адказнасці. Адміністрацыя раёну склала пратакол і перадала справу ў суд. Упраўленне адукацыі Першамайскага раёну склала пратакол аб парушэнні заканадаўства аб мовах (арт. 10.16 КаАП РБ).
Случак і Нагорная з паплечнікамі публікавалі падрабязныя інструкцыі аб тым, як пісаць звароты аб ужыванні беларускай мовы і куды звяртацца ў выпадку парушэння моўных правоў, выдалі папяровы дапаможнік «Абаронім мову», а цяпер Нагорная піша кнігу «Мова 404» аб парушэнні моўных правоў у Беларусі. У дом Случака і Нагорнай перыядычна наведваюцца сілавікі і невядомыя.
АА belsat.eu
