Бацькі Соф’і Сапегі і Рамана Пратасевіча паведамілі, што затрыманыя цяпер у здымнай кватэры, перадае расейская служба «BBC News».
«Мы ў шоку», – сказаў Сяргей Дудзіч, айчым Соф’і. Для бацькоў дзяўчыны гэта сталася нечаканасцю.
«Мне складана каментаваць дзеянні ўладаў, якія ў іх мэты, – сказаў Дзмітрый Пратасевіч, бацька Рамана. – Яны ўсё адно пад поўным кантролем уладаў, абвінавачанняў з іх ніхто не зняў. Нам нічога не кажуць пра стан Ромы, ягоны статус. Гэта проста здзек».
Самалёт «Ryanair» 23 траўня зрабіў прымусовую пасадку ў Менску праз інфармацыю пра мініраванне, якую экіпаж атрымаў ад беларускіх дыспетчараў. Блогер Раман Пратасевіч, які ляцеў гэтым рэйсам, і ягоная дзяўчына Соф’я Сапега былі затрыманыя спецслужбамі.
Падчас шматлікіх інтэрв’ю і брыфінгу Раман Пратасевіч падкрэсліваў, што ідзе на сустрэчу следству і ў поўнай меры супрацоўнічае з ім.
МГМ, belsat.eu