«Для нас гэта трагедыя». Як забарона пералётаў у Беларусь адбіваецца на звычайных людзях

Саміт ЕЗ заклікаў забараніць беларускім авіякампаніям палёты ў Еўразвяз. Нягледзячы на тое, што яго яшчэ маюць зацвердзіць міністры краінаў альянсу, некаторыя краіны ўжо самыя забараняюць палёты «Белавіі» і сваіх нацыянальных авіяперавознікаў.

З якімі цяжкасцямі цяпер сутыкаюцца звычайныя людзі, «Белсат» пацікавіўся ў беларусаў з розных краінаў.

«Дзеці заплакалі, калі даведаліся, што паездка да бабулі і дзядулі адмяняецца»

Мянчанка Кацярына планавала ад’езд у Польшчу разам з сям’ёй яшчэ з верасня мінулага года. Рыхтаваліся, разглядалі розныя варыянты з працаю і жытлом. Падзеі апошняга месяца падштурхнулі заняцца гэтым пытаннем больш актыўна. І вось – квіткі на руках: пералёт з авіякампаніяй Lot планавалі на 31 траўня. Аднак цяпер усё «павісла» ў рэжыме чакання і няпэўнасці.

Самалёт Ryanair. Фота: Niall Carson / PA Images / Forum

«Сёння пасля з’яўлення інфармацыі пра скасаванне палётаў прыехалі ў офіс кампаніі, хацелі высветліць сітуацыю: што рабіць, калі нам вернуць грошы. У офісе перавозніка чарга, але пакуль у працаўнікоў няма дакладнай інфармацыі. Афіцыйна рэйсы скасавалі толькі на сёння. Пра далейшыя адмены будзе вядома пазней», – кажа Кацярына.

У Кацярыны двое дзяцей, 8 і 4 гадоў. Яна займае актыўную пазіцыю, была назіральніцаю на леташніх выбарах. Цяпер сям’я не адчувае сябе ў бяспецы, таму пастанавілі ляцець у адзін канец.

Авіякампаніі адмаўляюцца лётаць праз Беларусь. Колькі грошай мы страцім?

«Мы не маглі нават падумаць, што за некалькі дзён да адʼезду можа здарыцца падобнае. Цяпер думаем, як можна выехаць. Наземным спосабам не выпадае – няма працоўнага запрашэння. Ехаць праз Маскву – дорага, і адтуль няма беспасярэдняга рэйсу ў Польшчу, толькі з перасадкамі. З двума маленькімі дзецьмі і рэчамі гэта нерэальна. Не ведаю нават, што рабіць у такой сітуацыі», – распавядае Кацярына.

Іна больш за 15 гадоў жыве ў Аўстрыі, працуе бухгалтаркаю. Раз на год яна традыцыйна прылятала на адпачынак да бацькоў у Беларусь. Праз пандэмію яна не бачыла бацькоў два гады, і цяпер невядома, калі яны змогуць сустрэцца.

«Для нас гэта трагедыя. Цягнікоў наўпроставых няма, ехаць аўтамабілем у «непрадказальную і беззаконную краіну» мой муж-аўстрыец асцерагаецца. Спачатку мы зарэзервавалі квіткі ў аўстрыйскай авіякампаніі, але рэйсы скасавалі. А цяпер і «Белавію»», – распавядае Іна.

У яе таксама двое дзяцей – 10 і 8 гадоў. Яны нават заплакалі, калі даведаліся, што паездка да бабулі і дзядулі адмяняецца.

«З двума маленькімі дзецьмі ў нас няма магчымасці трапіць у Беларусь. Яшчэ ёсць страх, што могуць не выпусціць назад, раптоўна ўвёўшы які-небудзь закон. Я вельмі засмучаная. Цяпер, выглядае, прыйдзецца да наступнага лета чакаць», – кажа Іна.

Аднак яна радая таму, што ўвага іншых краінаў зноў скіраваная на Беларусь. Паводле яе, у Аўстрыі ўсе горача абмяркоўваюць гісторыю з самалётам. Для іх гэта – сапраўдны шок.

«Усе ўсталі на дыбкі, пачаўся рух. Самы важкі аргумент – закранутыя еўрапейскія жыхары, якіх скралі. Я вельмі перажываю за Рамана Пратасевіча ды іншых палітвязняў. Мы гатовыя трываць нязручнасці, але каб гэтыя захады былі эфектыўныя, каб у Беларусі пачаліся змены. Веру, што справядлівасць пераможа!» – падсумавала Іна.

Самалёт авіякампаніі «Ryanair». Фота: Ryanair / Facebook

«Шмат людзей апынуліся ў няпростай сітуацыі, але няма ніякай інфармацыі, што рабіць»

Вікторыя родам з Берасця, жыве ў Вялікай Брытаніі 10 гадоў. Хацела гэтым летам разам з трохгадовым дзіцём прыляцець у Беларусь наведаць бацькоў. Кажа, праз пандэмію Беларусь заставалася адзінаю краінаю, куды не было праблемы прыляцець напрасткі. Аднак цяпер сітуацыя змянілася, і планы прыйдзецца перанесці да наступнага лета.

«Я пазваніла ў беларускую амбасаду ў Вялікай Брытаніі, але там усё стаіць, ніхто нічога не ведае. Самае кепскае, што шмат людзей цяпер апынуліся ў няпростай сітуацыі: напрыклад, знаёмая пакінула бабулі ў Менску сваё пяцігадовае дзіця, а самая вылецела ў Лондан. І што цяпер ёй рабіць?» – абураецца Вікторыя.

Што за «ліст пра бомбу» і калі паднялі знішчальнік. Версія беларускага боку пра захоп рэйсу «Ryanair»

У суполцы «Беларусы Вялікай Брытаніі» ў «Фэйсбуку» шмат падобных гісторый. Напрыклад, бацькі з Менску прыляцелі ў госці да сваіх дзяцей у Лондан, і цяпер не ведаюць, як вярнуцца.

«Найгорай, што няма ніякай інфармацыі на гэты конт, ніхто гэтымі сітуацыямі не займаецца. Чалавек не можа вярнуцца ў Беларусь з Лондану ці наадварот – дзе яму жыць, што есці, як быць?» – разважае Вікторыя.

Яна адзначае, што для іх склалася патавая сітуацыя – наземным чынам прыехаць у Беларусь немагчыма, а апошні шлях – самалётавы – перакрылі.

«Тут жа нават праз Маскву не прыляціш, бо туды дазволена прылятаць толькі грамадзянам ці рэзідэнтам Расеі», – кажа Вікторыя.

Максіму 24 гады, ён скончыў медычны ўніверсітэт у Польшчы і працуе рэаніматолагам у Нямеччыне. Ён вельмі ўважліва сочыць за апошнімі падзеямі ў нашай краіне. Сёння з’явілася інфармацыя пра спыненне палётаў нямецкімі авіялініямі, і цяпер у яго ўзнікла праблема з вяртаннем дадому, у Беларусь.

Францыя і Вялікая Брытанія забаранілі палёты «Белавіі», Украіна спыніла авіязлучэнне. І гэта яшчэ не ўсё

«Я планаваў ляцець у канцы месяца, а цяпер не ведаю як і што. Калі верыць інфармацыі на сайце «Белавіі», то квіткі можна купіць. Але яны паднялі кошт: учора яшчэ было 150 еўраў, сёння – ужо 200 еўраў. Але гэта цяпер – невядома, што будзе далей. Калі я набуду квіткі, а пасля забароняць і гэтай кампаніі лётаць у ЕЗ, то ці вернуць мне грошы за квіток – гэта раз, і як тады вылецець на працу ў Нямеччыну – гэта два», – распавядае Максім.

З верасня мінулага года ён прылятаў дадому да бацькоў чатыры разы. Цяпер – не зразумела, калі яны змогуць пабачыцца.

«Калі думаеш пра ўсё, што адбываецца, робіцца страшна. Я сазвоньваюся з блізкімі, сябрамі з Беларусі. Збольшага яны станоўча рэагуюць на санкцыі. Я стараюся са свайго боку толькі падтрымліваць. Людзі ў Нямеччыне вельмі абураныя гісторыяй з захопам самалёту. Мае знаёмцы падыходзяць, абмяркоўваюць са мною гэта ўсё. Падзеі ў Беларусі на парадку дня і ў мясцовых медыях: учора, напрыклад, з 15 хвілінаў навінаў на тэлебачанні 5-6 хвілінаў эфіру былі прысвечаныя Беларусі. Там абмяркоўваецца інцыдэнт з самалётам, згадалі разгром TUT.by і рэпрэсіі супраць журналістаў, прыгадалі, як адбываліся беларускія пратэсты», – пералічвае Максім.

«Страцім грошы, вядома, але горш за ўсё – мы не пабачымся з роднымі»

Руслан разам з жонкаю пераехаў з Беларусі каля года таму. Родныя, з якімі яны не бачыліся з моманту ад’езду, засталіся ў Беларусі. Усе разам яны планавалі супольны адпачынак, але Беларусь не разглядалі, бо, паводле Руслана, тут небяспечна. У выніку яны абралі найбольш зручны варыянт: сустрэцца на нейтральнай тэрыторыі – ва Украіне. Семʼі ўжо зарэзервавалі ўсе пералёты авіякампаніяй «Белавія», знялі жытло ў двух гарадах Украіны. Але цяпер праз закрыццё зносінаў паміж краінамі запланаваны адпачынак прыйдзецца скасаваць.

Беларускі Дэпартамент авіяцыі апублікаваў расшыфроўку перамоваў з экіпажам «Ryanair»

«Нашыя сямʼі не змогуць прыляцець ва Украіну, і ўвесь адпачынак адмяняецца. Прыйдзецца тэрмінова здаваць квіткі, мяняць броні. Страцім грошы, вядома, але горш за ўсё – мы не пабачымся з роднымі», – распавядае Руслан.

Цяпер паездку прыйдзецца адкласці на нявызначаны часу. Руслан кажа, што адгэтуль, здаецца, бессэнсоўна нешта планаваць з удзелам «Белавіі».

Насця – студэнтка, якая была вымушаная бегчы з Беларусі праз магчымы крымінальны пераслед. Часовым домам з сярэдзіны лістапада сталася Украіна. За ўвесь гэты час дзяўчына не бачыла нікога з родных і блізкіх, акрамя дзядзькі і ягонае сямʼі, якія таксама збеглі з краіны. Мама Насці і малодшая сястра збіраліся прыехаць да яе ў госці першага чэрвеня і застацца на тыдзень, але апошнія падзеі змянілі ўсе планы.

Лоўкостэры найхутчэй кампенсуюць кліентам страты за адмененыя рэйсы. Ілюстратыўны здымак Pixabay

«Як толькі мама даведалася, што ў яе на працы сканчаецца кантракт, а я буду ўсё яшчэ ў Украіне, адразу ж узяла квіткі туды і назад. Яны павінны былі ляцець «Белавіяй», – распавядае Насця.

Пакуль паездка і сустрэча з блізкімі адмяніліся.

«Можа быць, улетку сустрэнемся дзе-небудзь у Еўропе, калі я палячу на вучобу. Цяпер бацькі збіраюцца жыць недзе там», – мяркуе студэнтка.

Максім – маладзён, які цяпер таксама ва Украіне. Ён планаваў сустрэцца са сваім сябрам упершыню за шэсць месяцаў з моманту вымушанага пераезду з Беларусі. Праз гэтую сустрэчу Максім і ягоная дзяўчына перанеслі пералёт у іншую краіну. Мусілі туды ляцець, бо легальныя 180 дзён з моманту эміграцыі падыходзілі да заканчэння.

Знаёмы Максіма ўжо набыў квіткі з Беларусі ва Украіну і назад праз «Белавію». Але цяпер ён будзе спрабаваць вярнуць грошы за рэйсы. Сябар планаваў прыехаць у госці і перадаць Максіму грошы ад бацькоў, бо, як мяркуе хлопец, пераводзіць грошы праз картку цяпер вельмі небяспечна – могуць заблакаваць. Але нічога не атрымаецца.

Генеральны сакратар NATO заклікаў вызваліць Пратасевіча і расследаваць «небяспечную прымусовую пасадку»

«Іншага спосабу сустрэцца ў нас няма – мне ў Беларусь нельга, мяне адразу ж затрымаюць, а аднаму праз Расею ехаць занадта дорага, таму будзем чакаць лепшага моманту для сустрэчы», – распавядае Максім.

Праз скасаванне рэйсаў хлопец страціў «сустрэчу з сябрам і трохі грошай ад бацькоў». Але Максім кажа, што гатовы пачакаць і ахвяраваць сустрэчаю і грашыма, калі гэтыя санкцыі наблізяць крах рэжыму.

ПС, АД, belsat.eu

Hавiны