У ноч на 25 красавіка пачаўся пажар на двух нафтавых аб’ектах у расейскім Бранску, што за 130 кіламетраў ад мяжы з Украінаю.
Факт пажару на нафтабазе ў Фокінскім раёне Бранску афіцыйна пацвярджае Міністэрства надзвычайных сітуацыяў РФ. Паводле ўладаў, пацярпелых няма.
ТАСС са спасылкаю на прэс-службу ўраду Бранскай вобласці паведамляе, што гараць менавіта нафтавыя рэзервуары. Яны ўваходзяць у сістэму нафтаправоду «Дружба».
Крыніцы «Интерфакса» сцвярджаюць, што гарыць не адзін, а два абʼекты. Другі – рэзервуар з дызельным палівам на тэрыторыі нафтавага комплексу на Снежацкім вале.
Прычыну пажару расейскі бок не паведамляе.
Выданне «Baza» сцвярджае, што перад пажарам былі чуваць выбухі.
Раней, у пачатку красавіка, згарэла нафтабаза ў Белгарадзе, недалёка ад мяжы з Украінаю. Расейскія ўлады заявілі, што прычынаю сталася атака двух верталётаў ЗСУ. Украінскі бок афіцыйна гэтага не прызнаў.
РР belsat.eu
