У Кіеве 24 красавіка прэзідэнт Уладзімір Зяленскі сустрэўся з дзяржаўным сакратаром ЗША Энтані Блінкенам і міністрам абароны Лойдам Остынам. Пра візіт стала вядома постфактум.
Як паведамляе «Українська правда» са спасылкаю на свае крыніцы ў Офісе прэзідэнта, з меркаванняў бяспекі аб прыездзе не паведамлялі загадзя, але «сустрэчы былі вельмі прадуктыўныя».
Пасля таго як Блінкен і Остын пакінулі тэрыторыю Украіны, факт іхнай сустрэчы з Зяленскім пацвердзіў Дзяржаўны дэпартамент ЗША.
Гэта першы візіт высокапастаўленых амерыканскіх чыноўнікаў ва Украіну пасля пачатку расейскага ўварвання, адзначае Бі-Бі-Сі
Паведамляюць, што Украіне абяцалі дадатковую ваенную дапамогу на суму $ 713 мільёнаў.
Паводле Блінкена, у панядзелак Байдэн прызначыць новага амбасадара ЗША ва Украіне. Чакаюць, што ім станецца Брыджэт Брынк, цяперашняя амбасадарка ЗША ў Славаччыне.
Дзяржаўны сакратар ЗША таксама паабяцаў, што ў Кіеў з гэтага тыдня пачнуць паступова вяртацца дыпламаты, якія зʼехалі праз вайну.
Пасля Кіева міністр абароны ЗША Остын накіруецца ў Нямеччыну, дзе сустрэнецца з прадстаўнікамі 20 краінаў для абмеркавання вайсковай дапамогі Украіне.
Уладзімір Зяленскі ў сваім тэлеграм-канале падзякаваў ЗША за беспрэцэдэнтную дапамогу. Ён адзначыў, што на сустрэчы ў Кіеве абмяркоўвалася вайсковая дапамога, узмацненне санкцыяў супраць РФ, фінансавая дапамога Украіне і гарантыі бяспекі.
РР belsat.eu