Украіна заклікала ЕЗ цалкам заблакаваць транспартныя зносіны з Беларуссю і Расеяй

Міністэрства інфраструктуры Украіны накіравала афіцыйны зварот у Еўрапейскую камісію з прапановамі ўзмацніць эканамічны ціск на Расею і Беларусь.

Здымак мае ілюстрацыйны характар.

Фота: ЮШ / Белсат

Паводле інфармацыі Мінінфраструктуры, расейскі бізнес знаходзіць шляхі абыходу ўведзеных санкцыяў і працягвае ажыццяўляць аперацыі ў Еўропе. У сувязі з гэтым украінскі бок прапануе ЕЗ:

• цалкам заблакаваць наземныя і марскія транспартныя зносіны з Расеяй і Беларуссю;
• заблакаваць магчымасць транспартавання грузаў і людзей у Расею і Беларусь праз тэрыторыю Еўразвязу і праз яго межы;
• забараніць мытныя паслугі для тавараў, што дастаўляюцца ў Расею і Беларусь.

У ведамстве сцвярджаюць, што такія меры неабходныя для спынення імпарту ў краіны-агрэсары тавараў двайнога прызначэння, якія могуць выкарыстоўвацца для ваенных патрэбаў.

Раней Міністэрства інфраструктуры ўжо заклікала краіны ЕЗ закрыць парты для Расеі і звязаных з ёй кампаніяў, а таксама здзейсніць захады супраць аўтамабільных транспартавальнікаў з Расеі і Беларусі.

АД belsat.eu