Генеральная пракуратура распачала крымінальную справу супраць старшыні незарэгістраванага Саюзу палякаў у Беларусі Анджэлікі Борыс ды іншых асобаў арганізацыі.
Іх абвінавачваюць у рэабілітацыі нацызму і апраўданні генацыду беларускага народу паводле ч. 3 арт. 130 КК («Наўмысныя дзеянні, накіраваныя на распальванне нацыянальнай і рэлігійнай варожасці праз прыкмету нацыянальнай, рэлігійнай, моўнай ды іншай сацыяльнай прыналежнасці, а таксама праз рэабілітацыю нацызму, учыненыя групай асобаў»).
У Генпракуратуры заявілі, што з 2018 года да цяперашняга часу на тэрыторыі Горадні ды іншых паселішчаў вобласці «з прыцягненнем непаўналетніх зарганізавалі і правялі шэраг незаконных масавых мерапрыемстваў для ўшанавання ўдзельнікаў антысавецкіх бандфармаванняў, якія дзеялі падчас і пасля Вялікай Айчыннай, рабавалі, забівалі мірнае насельніцтва Беларусі, знішчалі маёмасць. Іхныя дзеянні мелі на мэце рэабілітаваць нацызм, апраўдаць генацыд беларускага народу».
З раніцы 25 сакавіка ў некаторых сябраў Саюзу палякаў у Беларусі адбываюцца ператрусы ў межах крымінальнай справы. Вядома, што сілавікі прыйшлі да гарадзенскага журналіста Анджэя Пачобута, дырэктаркі грамадскай школы пры Саюзе палякаў у Ваўкавыску Марыі Цішкоўскай, да кіраўніцы лідскага аддзелу Саюзу палякаў у Беларусі Ірэны Бярнацкай.
Таксама сілавікі прыйшлі ў польскую грамадскую школу і сядзібу Саюзу палякаў у Горадні. Ператрус у сядзібе палякаў у Горадні ішоў ад 9:00 да 17:00.
– Гэта распачалося а 9-й гадзіне, мяне яшчэ ў офісе не было, былі людзі, якія працуюць у бюро. Прыйшлі 10 чалавек з розных аддзелаў міліцыі. Іх цікавіла ўсё, распачалі ад кожнага кабінету, на пачатку ў школе, пасля ў бюро, дзе нашая бухгалтэрыя, пасля ў рэдакцыі. Цікавіла іх усё. Усё праглядалі: кнігі, часопісы. Адразу забралі камп’ютары. І таксама праглядалі фотаапараты – іх пакінулі, але я не паглядзела, ці карткі памяці пакінулі, – распавяла «Белсату» Ірэна Валюс, віцэ-старшыня Саюзу палякаў Беларусі.
Днём 25 сакавіка прэм’ер-міністр Матэўш Маравецкі пракаментаваў на прэс-канферэнцыі ціск на актывістаў Саюзу палякаў у Беларусі.
«Гэта абсалютна недапушчальна, што дэ-факта палякаў бярэ ў закладнікі рэжым Лукашэнкі, зараз мы прымаем меры», – сказаў ён падчас прэс-канферэнцыі.
Таксама вядома пра тое, што Польшча прапанавала Літве і Латвіі ўвесці супраць Беларусі супольныя эканамічныя санкцыі праз пераслед Саюзу палякаў.
АД, belsat.eu