Беларускія дыяспары працягваюць працу ў галіне эканамічнага ціску і звяртаюцца да заходняга б бізнэсу наконт захавання этычных нормаў з прычыны парушэнняў правоў працоўных у іх партнёраў у Беларусі.
Пасля некалькіх месяцаў кантактаў і расследавання сітуацыі з правамі працоўных на Беларускім металургічным заводзе (БМЗ), 23 снежня вядучы італьянскі вытворца шын «Pirelli Group» пацвердзіў Прафесійнаму звязу беларусаў Вялікай Брытаніі пра рашэнне «спыніць камерцыйныя стасункі з БМЗ».
«Pirelli» вырабляе шыны, сярод іншага, для гонак Формулы-1 і згадваецца сярод асноўных кліентаў аўстрыйскай даччынай кампаніі BMZ, Belmet GmbH.
Раней у чэрвені шведская «Scandia Steel» прыняла рашэнне «адмовіцца ад БМЗ як пастаўшчыка і прыпыніць будучыя заказы на пастаўку БМЗ». У ліпені аналагічнае рашэнне прыняла «Yokohama Rubber Group». Французская група «Michelin» працягвае расследаванне парушэнняў правоў працоўных на БМЗ.
Таксама швейцарская фармацэўтычная кампанія Sandоz цалкам спыняе закуп рэкламы на беларускім дзяржаўным тэлебачанні з 2022 года. Адпаведны ліст ад кампаніі атрымаў тэлеграм-канал «Стоп Пропаганда. КП».
«Sandоz размяшчае сезонную рэкламу на некаторых рынках па ўсім свеце, у тым ліку Беларусь. Аднак у выпадку Беларусі гэтая дзейнасць абмежаваная. […] У рамках нашага бягучага планавання рэкламы на 2022 фінансавы год ва Усходняй Еўропе мы не плануем ніякіх трансляцый на тэлеканалах, аб якіх вы згадваеце ў сваім лісце», – гаворыцца ў адказе кампаніі.
Раней стала вядома, што брытанскі вытворца безрэцэптурных медычных прэпаратаў «Mentholatum» ужо месяц як перастаў рэкламаваць сваю прадукцыю на беларускім дзяржаўным тэлебачанні.
Таксама нямецкі канцэрн «Henkel», вытворца вядомых касметычных і мыйных сродкаў, плануе адмовіцца ад рэкламы на беларускіх дзяржаўных тэлеканалах праз парушэнне правоў чалавека ў краіне.
МГ belsat.eu