Палітык Статкевіч пасля ШІЗА трапіў у медчастку з пнеўманіяй. Ягоная жонка: «Я не хвалююся – я крычу»

Асуджаны на 14 гадоў зняволення палітык Мікола Статкевіч знаходзіцца ў медычнай частцы. Пра гэта ў Facebook паведаміла ягоная жонка Марына Адамовіч.

Здымак мае ілюстрацыйны характар. Фота: АЛ / Белсат

Яна распавяла, што 23 лістапада да палітвязня не пусцілі адваката, патлумачыўшы гэта клопатам аб яго здароўі.

«Мікалай – у медсанчастцы. У яго пнеўманія. Пасля трох ранейшых кавідаў. Я не хвалююся – я крычу», – адзначыла жонка палітвязня.

Марына Адамовіч паведаміла, што пра тое, што «падчапіў нейкі вірус», Мікола Статкевіч пісаў ёй у лісце яшчэ ад 10 лістапада. Пры гэтым ён паведаміў, што на наступны дзень мусіць зноў накіравацца ў ШІЗА.

«У санчастцы Мікалай нядаўна, усяго пару дзён. Вось я і думаю, дзе ён правёў папярэднія, мінімум, 10? Верагодна, у ШІЗА», – мяркуе жонка палітыка.

Яна таксама адзначыла, што перад тым як размясціць чалавека ў ШІЗА, доктар абавязаны засведчыць, што стан здароўя дазваляе яму там знаходзіцца:

«Што трэба было рабіць гэтыя два тыдні, наколькі трэба было ігнараваць стан чалавека, каб ён, у выніку, апынуўся ў медсанчастцы? І якім «кранальным» мусіць быць клопат пра яго здароўе зараз, каб не пусціць да яго адваката?»

14, 16, 18 гадоў… Што значаць лічбы прысудаў у «справе Ціханоўскага»?

Мікола Статкевіч знаходзіцца за кратамі амаль 2,5 гады. 14 снежня 2021 года яму быў вынесены прысуд: 14 гадоў зняволення ў калоніі асаблівага рэжыму. У канцы чэрвеня быў этапаваны з гомельскага СІЗА-3 у глыбоцкую калонію № 13. З таго часу яго рэгулярна змяшчаюць у ШІЗА.

Якуб Хруст belsat.eu

Падпісвайся на telegram Белсату

Hавiны