Сына палітзняволенай Таццяны Канеўскай Аляксея арыштавалі другі раз. За кратамі ён правядзе месяц
Аляксей Канеўскі не выйшаў на волю пасля арышту – яго перазатрымалі і адправілі на 15 содняў другі раз, паведамляе праваабарончы цэнтр «Вясна». Выпусціць мужчыну павінны 8 снежня.
Аляксея затрымалі 8 лістапада ў будынку суда, куды яго выклікалі як сведку. Прычынай затрымання стала антывірусная маска з надпісам «Честные люди», што суд палічыў несанкцыянаваным пікетаваннем і пакараў гамельчука 15 соднямі ў ізалятары. Аднак пасля сканчэння гэтага тэрміну Аляксей не выйшаў на волю – яго зноў арыштавалі на 15 содняў. Паводле якога артыкулу гэтым разам – невядома.
За кратамі мужчына правядзе агулам месяц, на волю ён мусіць выйсці 8 снежня.
Аляксей Канеўскі – сын палітзняволенай жыхаркі Гомля Таццяны Канеўскай, асуджанай да 6 гадоў калоніі. Яшчэ адзін сын Таццяны, малодшы брат Аляксея Дзмітрый таксама ў зняволенні, асуджаны да 3 гадоў калоніі.
ГГ, belsat.eu
